आहा ! रारा गोल्डकपः थ्री स्टार क्लब सेमिफाइनलमा

ललितपुरको थ्री स्टार क्लबले आहा ! रारा पोखरा गोल्डकप फुटबलको सेमिफाइनलमा स्थान बनाएको छ।

पोखरा रंगशालामा आज (आइतबार) भएको दोस्रो क्वाटरफाइनलमा मछिन्द्र क्लबलाई हराउँदै थ्री स्टारले सेमिफाइनलमा स्थान बनाएको हो।

थ्री स्टारले मछिन्द्रलाई पेनाल्टी शुटआउटमा ४–२ गोलले हरायो।

निर्धारित ९० मिनेटको खेल गोलरहित बराबरीमा सकिएपछि खेलमा ३० मिनेट थप भएको थियो।

थप समयमा पनि गोल हुन नसकेपछि खेल टाइब्रेकरमा पुगेको हो।

अब, थ्री–स्टारले फाइनलका लागि मंगलबार हुने उज्वेकिस्तानको ब्ल्याक बुल्स फुटबल क्लब र भारतको पाहूना टोली थन्डर नर्थ युनाइटेडबीचको विजेतासँग सेमिफाइनल खेल्नेछ।

२४ औं संस्करणको पोखरा गोल्डकपको फाइनल खेल आउँदो फागुन ३ गते हुनेछ।

प्रतियोगिताको विजेताले १२ लाख १ हजार नगद पुरस्कार पाउनेछ।

उपविजेताले ६ लाख १ हजार रुपैयाँ पुरस्कार पाउनेछ।