उच्च अदालतको आदेशपछि रबि लामिछाने आफ्नै घरबाट पक्राउ

उच्च अदालत तुलसीपुरको आदेशपछि राष्ट्रिय स्वतन्त्र पार्टी (रास्वपा)का सभापति रबि लामिछाने पक्राउ परेका छन्।

अदालतको आदेश भएको केही घण्टाभित्रै लामिछानेलाई प्रहरीले पक्राउ गरेको हो।

उनलाई उपत्यका अपराध अनुसन्धान कार्यालयको टोलीले बुढानीलकण्ठस्थित हेपाली हाइटबाट पक्राउ गरेको हो।

शुक्रवार उच्च अदालत तुलसीपुरको बुटवल इजलासले उनलाई सहकारीको रकम ठगेको कसुरमा पुर्पक्षका लागि थुनामा पठाउन आदेश गरेको थियो।

न्यायाधीशद्वय रमेश ढकाल र स्वीकृति पराजुलीले सो आदेश गरेका हुन्।

यसअघि, गत माघ १३ गते रुपन्देही जिल्ला अदालतका न्यायाधीश प्रहृलादकुमार योगीको इजलासले रविलाई १ करोड धरौटीमा रिहा गर्न आदेश दिएको थियो।

यस्तै, छविलाई पुर्पक्षका लागि थुनामा पठाएको थियो।

त्यसविरुद्ध परेका निवेदनमा हिँजो (बिहीबार) नै सुनुवाइ सुरु भएपनि बहस नसकिएपछि शुक्रबारलाई हेर्दाहेर्दैमा राखिएको थियो।

अदालतले आज (शुक्रबार) साँझ रवि र छवि दुवै जनालाई थुनामा पठाउने आदेश गरेको हो।

छविलाई थुनामा राखेपनि उस्तै कसुरदार रविलाई धरौटीमा छाडिएको भन्दै सरकारी वकिल कार्यालयले रविलाई पनि थुनामा पठाउन माग गर्दै उच्च अदालतमा निवेदन दिएको थियो।

उच्च अदालतले सरकारी वकिलको माग बमोजिमको आदेश गरेको हो।

रविले भने १ करोड धरौटी चर्को भएको भन्दै साधारण तारेखमा राख्न माग गर्दै उच्चमा निवेदन दिएका थिए।

सुप्रिम सहकारीमा रवि, छवि र जीबी राईसहित ४२ जनालाई प्रतिवादी बनाइएको छ।

उनीहरुले सहकारीको ५५ करोड रुपैयाँभन्दा बढी रकम अपचलन गरेको अभियोग छ।

रवि, छवि र जीबीले यसमध्ये १० करोड ९९ लाख ३६ हजार रकम छुट्टै अपचलन गरेको अभियोगमा उल्लेख छ।

जीबी राई भने फरार छन्।