काभा पुरुष भलिबलमा भारतीय क्यालिकट हिरोजको पहिलो जीत

भारतको क्यालिकट हिरोजले सेन्ट्रल एसियन भलिबल एसोसिएसन (काभा) पुरुष क्लब च्याम्पियनसीपमा पहिलो जीत निकालेको छ।

काठमाण्डौंको त्रिपुरेश्वरस्थित राष्ट्रिय खेलकुद परिषद् (राखेप) कभर्डहलमा सोमबार क्यालिकटले माल्दिभ्सको क्लब एचडीसीलाई ३–० को सोझो सेटमा हराएको हो।

क्यालिकटले पहिलो सेटमा २५–१३ ले सहज जीत निकाल्यो।

दोस्रो सेटमा २५–२३ को कठिन जीत निकाल्यो।

त्यसैगरी, तेस्रो सेटमा २५–२१ ले जित्यो।

जीतसँगै क्यालिकटले २ खेलबाट ४ अंक जोडेको छ।

क्यालिकट पहिलो खेलमा नेपालको हेल्प नेपाल स्पोर्टस क्लबलाई ३–२ को सेटमा खेल सुम्पेको थियो।

यता, लगातार दोस्रो हार ब्यहोरेको एचडीसीले ३ खेलबाट ३ अंक जोडेको छ।

एचडीसीले पहिलो खेलमा नेपालको गण्डकी प्रदेशलाई ३–२ को सेटमा हराएको थियो।

एचडीसी, दोस्रो खेलमा इरानको यु–१८ टोलीसँग ३–२ सेटकै हार ब्यहोरेको थियो।