खेलकुद पत्रकार मञ्च, गण्डकीको तेस्रो अधिवेशन सुरु

नेपाल खेलकुद मञ्च, गण्डकीको आज (विहीबार) पोखरामा तेस्रो अधिवेशन सुरु भएको छ।

अधिवेशनको उद्घाटन सत्रमा मञ्चले संथापक अध्यक्ष रामकृष्ण ज्ञवाली, पूर्व अध्यक्ष विनोद लामिछाने, गण्डकीका संस्थापक अध्यक्ष केशव पाठक, सल्लाहकार एकराज गिरी र रन्जन अधिकारीलाई सम्मान गरेको छ।

त्यसैगरी, पत्रकार कल्याणकारी कोषमा सहयोग गर्ने सहारा क्लव, सुर्दशन रञ्जित, विजय नेपाल र दीननाथ बराललाई सम्मान गरेको छ।

गण्डकी प्रदेशका सामाजिक विकास युवा तथा खेलकुदमन्त्री बिन्दुकुमार थापाले विहीबार पोखरामा अधिवेशनको उद्घाटन गरेका हुन्।

कार्यक्रममा बोल्दै मन्त्री थापाले गण्डकी प्रदेशको राजधानी पोखरामा खेल पर्यटनको अथाह संभावना रहेको औंल्याए।

मन्त्री थापाले भने, ‘पर्यटनको राजधानी पोखरामा खेलकुद राजधानीको समेत संभावना छ।’

प्रदेशको सामाजिक विकास खेलकुद मन्त्रालयले खेलकुदको क्षेत्रमा बिषेश ध्यान दिदै आएको मन्त्री थापाको भनाई थियो।

मञ्च गण्डकीका अध्यक्ष दीननाथ बरालको अध्यक्षतामा सम्पन्न भएको कार्यक्रममा रुपा गाउँपालिकाका अध्यक्ष नवराज ओझा, भूतपूर्व खेलाडी मञ्चका अध्यक्ष दीलबहादुर गुरुङ, मञ्चका संस्थापक अध्यक्ष रामकृष्ण ज्ञवाली, सल्लाहकार एकराज गिरी, पत्रकार महासंघ गण्डकी प्रदेशका अध्यक्ष रमेश पौडेल, जिल्ला अध्यक्ष माधव बराल, सहारा क्लवका अध्यक्ष केशवराज बराल, मञ्चका उपाध्यक्ष सुरज श्रेष्ठ, महासचिव राजाराम पौडेल, सचिव शसिकुमार पौडेल, कोषाध्यक्ष कविता घर्तीमगरलगायतले वोलेका थिए।

अधिवेशनले २ वर्षे कार्यकालका लागि नयाँ कार्यसमिति चयन गर्नेछ।

अहिले, नयाँ कार्यसमितिको लागि निर्वाचन प्रकृया अघि बढेको मञ्चले जनाएको छ।