‘खेल पर्यटनको माध्यमबाट गण्डकी प्रदेशको विकास गर्न सकिन्छ’

गण्डकी प्रदेशका मुख्यमन्त्री सुरेन्द्रराज पाण्डेले खेल पर्यटनको माध्यमबाट गण्डकी प्रदेशको विकास गर्न सकिने बताएका छन्।

पोखराको लेखनाथस्थित भण्डारढिकमा सुरु २५ औं संस्कणको आदर्श कप फुटवल प्रतियोगिताको उद्घाटन गर्दै मुख्यमन्त्री पाण्डेले भने, खेल पर्यटनको माध्यमबाट यस क्षेत्रको विकास गर्न प्रदेश सरकारले लक्ष्य लिएको छ।’

मुख्यमन्त्री पाण्डेले गण्डकी प्रदेश धेरै पर्यटकीय संभावना बोकेको स्थल भएको उल्लेख गरे।

‘पर्यटन नै प्रदेशको समृद्धिको महत्वपूर्ण आधार भएकाले विभिन्न खेल गतिविधिहरुलाई पर्यटनसँग जोडेर समग्र गण्डकी प्रदेशको विकास गरिनेछ’ उनको टिप्पणी थियो।

मुख्यमन्त्री पाण्डेले खेल क्षेत्र र खेलाडीको विकासका लागि प्रदेश सरकार गंभीर रहेको वताए।

उनले प्रतिबद्धता जनाए, ‘यहाँको खेल क्षेत्रको विकासका लागि सरकारले विभिन्न कार्यक्रम गरिरहेको छ। यहाँको कर्भड हल र रंगशाला निर्माण र स्तरोन्नतीको लागि प्रदेश सरकारले केही न केही सहयोग गर्नेछ।’

उनले पोखरालाई पर्यटकिय राजधानी घोषणा गरिएको अवस्थामा अन्य क्षेत्रको साथसाथै खेल पर्यटनको माध्यमबाट पनि प्रदेशलाई राष्ट्रिय र अन्र्तराष्ट्रिय रुपमा चिनाउन चाहेको वताए।

प्रदेशभित्रका खेलकुद एवं पर्यटकीय पुर्वाधारहरु निर्माणमा प्रदेश सरकार लागिरहेको उनको भनाई थियो।

‘प्रदेश सरकारले मुस्ताङमा हाई अल्टिच्यूड खेल मैदान निर्माण गरि संसारभरका खेलाडीहरुलाई ल्याएर खेलाउने योजना छ। ओलम्पिकमा सहभागी खेलाडीको अनुभव आदान–प्रदानका लागि गण्डकी प्रदेश सरकारले गत वर्षदेखि ‘स्कुल टु ओलम्पियन’ कार्यक्रम गरिरहेको छ। प्रदेशबाट ओलम्पिकमा सहभागी खेलाडीहरूलाई आर्थिक सहयोग पनि गरिरहेको छ’, मुख्यमन्त्री पाण्डेको भनाई छ।

पोखरा महानगरपालिका–२९ का वडाध्यक्ष श्रीप्रसाद गुरुङले आर्थिक अभावका कारण रंगशाला निर्माणले पुर्णता नपाएको वताए।

वडाध्यक्ष गुरुङले यसप्रति प्रदेश सरकारको ध्यानार्कषण गराए।