गण्डकी विश्वविद्यालयको कुलपतिमा ७ जनाको आवेदन

गण्डकी विश्वविद्यालयमा रिक्त रहेको कुलपति पदमा ७ जनाको आवेदन परेको छ।

फागुन २१ बाट १५ दिनको म्याद राखेर सूचना जारी भएकामा अन्तिम दिन बुधबारसम्म ७ जनाको आवेदन परेको हो।

आवेदन दिनेमा प्राध्यापक कृष्णप्रसाद गौतम, प्राडा विश्वकल्याण पराजुली, प्राडा नवराज देवकोटा, डा कृष्णप्रसाद अधिकारी, प्राडा कुश्माकर न्यौपाने, प्राडा ईन्द्रप्रसाद तिवारी र प्राडा सरोज कोइराला छन्।

संस्थापक कुलपति कुलपति प्राडा गणेशमान गुरुङको कार्यकाल सकिनुअगावै विश्वविद्यालय ऐन अनुसार नै सिफारिस समिति गठन गरिएको थियो।
कुलपति गुरुङको कार्यकाल फागुन ३ गते सकिएको हो।

गण्डकी विश्वविद्यालय ऐन २०७६ को दफा २३ मा कुलपतिसम्बन्धी व्यवस्था गरिएको छ।

उक्त दफाको उपदफा ३ मा कुलपति नियुक्तिका लागि सिफारिस गर्न न्यासिक परिषद अध्यक्षको संयोजकत्वमा ३ सदस्यीय समिति गठन गरिने व्यवस्था छ।

जसमा प्रदेश लोकसेवा आयोगले तोकेको आयोगको सदस्य र न्यासिक परिषदले तोकेको न्यासिक परिषद सदस्य रहने प्रावधान छ।
हाल, न्यासिक परिषद् अध्यक्ष प्राडा कैलाशनाथ प्याकुरेल छन्।

छनोट समिति सदस्यमा लोक सेवा आयोगबाट सदस्य कल्पना लम्साल र न्यासिक परिषद्बाट यमुना घले छन्।

समितिको सचिवालय स्थापना भइसकेपछि कार्यविधि बनाएर दरखास्त आह्वान गरिएको हो।