गोरखाको बारपाक सुलिकोटमा अनाथ बालबालिकालाई आवासीय सुविधासहितको निःशुल्क शिक्षा

उत्तरी गोरखाको बारपाक सुलिकोट गाउँपालिकाले आफ्नो कार्यक्षेत्रका अनाथ बालबालिकालाई आवासीय सुविधासहित निःशुल्क पठनपाठनको व्यवस्था मिलाएको छ।

गाउँपालिका–६ स्थित बाह्रकोटमा मनास्लु छात्रावास संचालनमा ल्याएर अभिभावकविहीन बालबालिकालाई खाने, बस्ने आवासीय व्यवस्थासहितको निःशुल्क पठनपाठनको प्रबन्ध गरेको हो।

हाल, छात्रवासमा ९ छात्रा र १० छात्र गरी १९ जना बालबालिकाहरु छन्।

गाउँपालिका अध्यक्ष विष्णुप्रसाद भट्टले उनीलाई कक्षा १२ सम्म निःशुल्क शिक्षा दिइने प्रतिबद्धता जनाएका छन्।

उनले भने, `चालु शैक्षिकसत्रदेखि पालिकाभित्र विद्यालय जान नपाएका अभिभावकविहीन बालबालिकालाई निःशुल्क खान, बस्न र पठनपाठनको व्यवस्था गरेका छौँ। अहिले १९ जना अनाथ बालबालिका गाउँपालिकाले संचालन गरेको छात्रावासमा अध्ययनरत छन्। बालबालिकाका लागि आवश्यक पर्ने केही लत्ताकपडा, किताबकापी, कलमलगायतका सामग्री ईच्छुक दाताहरुबाट सहयोग लिने गरेका छौँ।’

अनाथ बालबालिकालाई निःशुल्क पठनपाठन तथा खान, बस्नको व्यवस्थाका लागि गाउँपालिकाले चालु आर्थिक वर्षमा १२ लाख रुपैयाँ विनियोजन गरेको थियो।

छात्रवासमा २ जना महिला कार्यालय सहयोगी, छात्रवास सुरक्षाका लागि सुरक्षाकर्मी र  निरीक्षक १ जनाको समेत व्यवस्था गरेको छ।