आहा ! रारा गोल्ड कप: चर्च ब्वाइज युनाइटेड सेमिफाइनलमा

चर्च ब्वाइज युनाइटेडले पोखरामा जारी २४ औँ संस्करणको आहा ! रारा पोखरा गोल्ड कप फुटबल प्रतियोगिताको सेमिफाइनलमा स्थान बनाएको छ।

पोखरा रंगशालाको फुटबल मैदानमा भएको तेस्रो क्वाटर फाइनल खेलमा विभागीय टोली त्रिभुवन आर्मी क्लबलाई १—० को गोल अन्तरले पराजित गर्दै चर्च ब्वाइज सेमिफाइनल प्रवेश गरेको हो।

चर्च ब्वाइजको जितमा खेलको ९० मिनेटमा अतिरिक्त खेलाडी राज भुषालले हेडमार्फत गोल गरेका हुन्।

खेलको २५ औँ मिनेटमा रोहन कार्की घाइते भएपछि उनको स्थानमा भुषाल मैदानमा छिरेका थिए।

अन्तिम एक मिनेटमा सम्हालिन नसक्दा गत वर्षको डिफेन्डिङ च्याम्पियन आर्मी यसपालिको आहा ! रारा पोखरा गोल्ड कपको क्वाटरफाइनलबाटै बाहिरिएको छ।

समुह ‘ए’ मा रहेको चर्च ब्वाइजले अब माघ ३० गते पहिलो सेमिफाइनलमा नेपाल पुलिस क्लबसँग फाइनलका लागि प्रतिस्पर्धा गर्नेछ।

मंगलवार चौथो क्वाटर फाइनल खेल उज्वेकिस्तानको ब्ल्याक बुल्स फुटबल क्लब र भारतको पाहूना टोली थन्डर नर्थ युनाइटेडबीच हुनेछ।