टाइगर कप भलिबलः आयोजक टाइगर ग्रुप र आर्मीबीचको खेल स्थगित

पाँचौं संस्करणको एनसेल टाइगर कप भलिबल प्रतियोगिताको आयोजक टोली र विभागीय त्रिभुवन आर्मी क्लबबीचको उद्घाटन खेल भने स्थगित भएको छ।

आयोजक टाइगर ग्रुप र विभागीय आर्मीबीचको खेलमा तेस्रो सेटको खेल सकिँदा भिजिबिलिटी कम हुँदा स्थगित भएको हो।

पहिलो सेटमा २२–२० को अग्रता जोगाउन नसक्दा आयोजक टोली टाइगर ग्रुप २३–२५ ले गुमाउन पुग्यो।

दोस्रो सेटमा पनि खेललाई आर्मीले २५–२२ ले आफ्नो पक्षमा बनायो।

तेस्रो सेटमा भने उत्कृष्ट प्रदर्शन गर्दै आयोजक टोली टाइगर ग्रुपले २५–२१ ले जीत निकाल्यो।

त्यसपछि, रेफ्री टहलसिंह थापाले २ टोलीका कप्तानसँग छलफल गरी खेल स्थगित गरे।

खराब प्रकाशका कारण खेल स्थगित गरिएको हो।

भोली (आइतबार) उक्त खेल गर्ने रेफ्री थापाले बताए।

आज शनिबारबाट सुरु पाँचौं संस्करणको टाइगर कप भलिबल १९ गतेसम्म चल्नेछ।

प्रतियोगिताको पुरुषतर्फका खेल भने भोली आइतबार हुनेछन्।

नेपाल सरकारका प्रवक्तासमेत रहेका सूचना तथा प्रविधिमन्त्री पृथ्वीसुब्बा गुरुङले प्रतियोगिताको उद्घाटन गरेका हुन्।

तस्बीरः बसन्त शेर्पा