नेपाल एशियन कप छनोट फुटबलमा मलेसियासँग पराजित

नेपाल एएफसी एशियन कप–२०२७ को छनोटको फुटबल खेलमा मलेसियासँग पराजित भएको छ।

मलेसियाको जोहोरबारूस्थित सुल्तान इब्राहिम रंगशालामा हिँजो (मंगलबार) भएको खेलमा नेपाल २–० ले पराजित भएको हो।

मलेसियाले दुवै हाफमा १/१ गोल गर्‍यो।

मलेसियाको जीतमा हेक्टर हेभल र ला भेरे कोर्बिन अङले गोल गरे।

खेलको २९ औं मिनेटमै मलेसियाले सुरुआती अग्रता लिएको थियो।

मलेसियाली जर्सीमा डेब्यु खेलमै हेक्टर हेभलले गोल गर्दै टिमलाई १–० को अग्रता दिलाएका हुन्।

त्यसैगरी, ७० औं मिनेटमा नेपालले दोस्रो गोल खान पुग्यो।

मलेसियाली ला भेरे कोर्बिन अङले गोल गरेका गर्दै अग्रता दोब्बर बनाए।

फ्रिकिकबाट सुरु भएको उत्कृष्ट सेटअप प्लेमा अरिफ आइमान हनापीले पास मिलाउँदै अङलाई अवसर दिलाएका थिए।

जसमा अङले कुनै गल्ती नगरी गोल गरे।

नेपालले यससँगै छनोटको तेस्रो चरण हारबाट शुरुआत गरेको छ।

समूह ‘एफ’ मा नेपाल र मलेसियासँगै भियतनाम र लाओस छन्।

अर्को खेलमा भियतनामले लाओसलाई ५–० गोलले हराएको छ।

अब, जुनमा हुने छनोट खेलमा नेपालले लाओससँग खेल्नेछ।

त्यसैगरी, अर्को खेलमा भियतनाम र मलेसियाबीच प्रतिस्पर्धा हुनेछ।

यस पटकको छनोटमा एशियाका २४ टोली ६ समूहमा विभाजित छन्।

होम एण्ड अवे पद्धतीमा खेलाइने छनोटपछि हरेक समूहको शीर्ष टोली एसियन कपमा छनोट हुनेछ।

नेपाल र मलेसियाबीचको हिँजोको खेल नेपालमा हुनुपर्ने भएपनि एशियाली फुटबल महासंघले दशरथ रंगशालालाई मान्यता नदिएपछि खेल मलेसियामा भएको हो।