नेपाल पुलिसलाई प्रधानमन्त्री कप क्रिकेटको उपाधि

विभागीय नेपाल पुलिस क्लबले प्रधानमन्त्री कप पुरुष राष्ट्रिय क्रिकेट प्रतियोगिताको उपाधि जितेको छ।

भैरहवास्थित सिद्धार्थ क्रिकेट रंगशालामा आज (शनिबार) भएको फाइनलमा त्रिभुवन आर्मी क्लबलाई ६ विकेटले पराजित गर्दै पुलिसले उपाधि जितेको हो।

उपाधिसँगै पुलिसले १० लाख रुपैयाँ नगदसहित आकर्षक ट्रफी हात पारेको छ।

उपविजेतामा सीमित त्रिभुवन आर्मी क्लबले पाँच लाख रुपैयाँ नगदसहित रनरअप ट्रफी पायो।

जितका लागि १५५ रनको लक्ष्य पछ्याएको पुलिसले २५.२ ओभरमा ४ विकेटको क्षतिमा पूरा गर्‍यो।

पुलिसका लागि ओपनर कुशल भुर्तेलले सर्वाधिक ६१ रन बनाए।

७० बलको सामाना गरेका कुशलले ७ चौका र ३ छक्का प्रहार गरे।

यस्तै, अमित श्रेष्ठले ३९ रन जोडे।

त्यस्तै, दिलिपनाथले अविजित ३१ रन थपे।

आर्मीका लागि साहब आलमले ३ विकेट लिए।

नरेन साउदले १ विकेट लिए।

यसअघि, टस हारेर ब्याटिङको निम्तो पाएको आर्मीले ४३ ओभरमा सबै विकेट गुमाउँदै १५४ रन बनाएको थियो।

२५ रनमै ५ विकेट गुमाएको आर्मीका लागि कप्तान विनोद भण्डारी र वसीर अहमदले ७५ रन बढीको साझेदारी गरेका थिए।

आर्मीका लागि बसीर अहमदले १०४ बलको सामना गर्दै ९ चौका र १ छक्काको सहयोगमा सर्वाधिक ८६ रन बनाए।

उसका लागि कप्तान विनोद भण्डारीले २९ रनको योगदान दिए।

त्यसबाहेक विवेक यादवले ११ रन जोडे।

अन्य कुनै पनि ब्याट्सम्यानले दोहोरो अंक समेत जोड्न सकेनन्।

आर्मीलाई सस्तोमै समेट्ने क्रममा बलिङतर्फ नेपाल पुलिसका करण केसीले ७ ओभरमा १ मेडेनसहित ३० रन खर्चेर ३ विकेट लिए।

सागर ढकालले ८ ओभरमा २९ रन खर्चेर ३ विकेट लिए।

कप्तान दीपेन्द्रसिंह ऐरीले २ विकेट लिए।

ललित राजवंशी र गुलशन झाले समान १/१ विकेट लिए।

प्रधानमन्त्री कप पुरुष राष्ट्रिय क्रिकेट प्रतियोगिता अन्तर्गत यसपटक ४६ वटा खेल भएको थियो।

यी सबै खेल पहिलो पटक काठमाडौँ बाहिर रूपन्देहीमा रहेको सिद्धार्थ क्रिकेट रंगशाला, तिलोत्तमामा रहेको एक्स्ट्राटेक ओभल क्रिकेट रंगशाला र

दाङको लमहीमा रहेको देउखुरी अन्तरराष्ट्रिय रंगशालामा खेलाइएको हो।

प्रतियोगितामा ७ वटै प्रदेशका टोली र विभागीय कलबहरु नेपाली सेना, नेपाल प्रहरी र शसस्त्र प्रहरीको टोली सहित १० वटा टोलीले प्रतिस्पर्धा गरेका थिए।