पत्रकारको संसद् प्रवेश पास निलम्बन गरेकोमा पत्रकार महासंघको ध्यानाकर्षण

प्रश्न सोधेको आधारमा संघीय संसद् सचिवालयले पत्रकार किशोर श्रेष्ठ र प्रकाश ओलीको संसद् प्रवेश पास निलम्बन गरेकोमा नेपाल पत्रकार महासंघले आफ्नो ध्यानाकर्षण भएको जनाएको छ।

गत फागुन ४ गते प्रतिनिधिसभा बैठकपछि बाहिरिँदै गर्दा प्रधानमन्त्रीलाई प्रश्न गर्दा संसदीय मर्यादा र अनुशासनको उल्लघंन भएको भन्दै संघीय संसद् सचिवालयले उनीहरूको पास निलम्बन गरेको हो ।

महासंघले काउन्सिलको क्षेत्राधिकारलाई ख्याल गरी पत्रकारको पास निलम्बन फिर्ता लिई प्रेस स्वतन्त्रताको सम्मान गर्न संघीय संसद्‍लाई आग्रह गरेको छ।

ॅपत्रकारले सोधेको प्रश्न पत्रकार आचारसंहिता प्रतिकूल भए/नभएको मापन गर्ने क्षेत्राधिकार प्रेस काउन्सिल नेपालको हो। महासंघ काउन्सिलको क्षेत्राधिकारलाई ख्याल गरी पत्रकारको पास निलम्बन फिर्ता लिई प्रेस स्वतन्त्रताको सम्मान गर्न संघीय संसद्समक्ष आग्रह गर्दछ’, महासंघका महासचिव रामप्रसाद दाहालद्वारा जारी विज्ञप्तिमा भनिएको छ।

पेशागत धर्म निर्वाहका क्रममा पत्रकार आचारसंहिताको ख्याल गर्न पत्रकार तथा संचारमाध्यमसमेतको महासंघले ध्यानाकर्षण गराएको छ।

पत्रकार श्रेष्ठ र ओलीले प्रधानमन्त्री ओलीलाई प्रश्न सोध्ने क्रममा ’तानाशाह’ र ’हिटलर’ जस्ता अमर्यादित शब्दहरू प्रयोग गरेको संसद सचिवालयको आरोप छ।

संसद्का महासचिवको निर्णयअनुसार उनीहरूको प्रवेश पास एक महिनाका लागि निलम्बन गरिएको सचिवालयले जनाएको छ।

प्रकाश ओली सुनौलो नेपाल र किशोर श्रेष्ठ युवा मन नेपालमा कार्यरत पत्रकारहरु हुन्।

हेरौं, विज्ञप्ति