पत्रकार पदम जोशीलाई क्यान्सर सचेतना पत्रकारिता पुरस्कार प्रदान

पत्रकार पदमराज जोशीलाई राधा क्यान्सर सचेतना तथा हिंसाविरुद्धको राष्ट्रिय पत्रकारिता पुरस्कार प्रदान गरिएको छ।

पूर्वी नवलपरासीको कावासोती–२ स्थित राधा क्यान्सर फाउन्डेसनका अध्यक्ष प्रकाश शर्माका अनुसार स्थानीय लक्ष्मीनारायण मन्दिरमा शुक्रवार एक कार्यक्रम गरेर बैतडी निवासी हेल्थ टुडे पत्रिकाका सम्पादक जोशीलाई सो पुरस्कार वितरण गरिएको हो।

कार्यक्रमका प्रमुख अतिथि पूर्वमन्त्री एवं गण्डकी प्रदेश सांसद रोशनबहादुर गाहामगरले जोशीलाई पुरस्कार प्रदान गरेका हुन्।

पुरस्कार राशि २० हजार रुपैयाँ नगद छ।

फाउन्डेसनका परिकल्पनाकार स्वर्गीय राधा शर्माको जन्मदिन हरेक वर्षको फागुन ९ गते उक्त पुरस्कार प्रदान गरिदैँ आएको हो।

स्वास्थ्य बिटमा कलम चलाउने पत्रकार एवं संचारकर्मीलाई कदर स्वरूप उक्त पुरस्कार प्रदान गरिँदै आएको अध्यक्ष शर्माले बताए।

अघिल्लो वर्ष यो पुरस्कार नागरिक दैनिकका पत्रकार पवित्रा सुनारलाई प्रदान गरिएको थियो।

विक्रम सम्बत २०४८ मा जन्मिएकी राधाको २०७७ सालमा क्यान्सर रोगका कारण निधन भएको थियो।

बिगतदेखि पत्रकारिता गर्दै आएकी राधाले आफूलाई क्यान्सर रोगले छोएको चाल पाएदेखि उच्च मनोबलका साथ क्यान्सर सचेतना र महिला हिंसाविरुद्ध कलम चलाउँदै आएकी थिइन्।