पत्रकार महासंघ कास्कीमा महिला श्रमजीवीका कुराहरु 

पत्रकार महासंघ कास्की शाखामा महिला सम्वाद कार्यक्रम गरिएको छ।

११५ औं अन्तराष्ट्रिय श्रमिक महिला दिवसको अवसरमा पत्रकार महासंघ कास्कीले महिला अधिकारकर्मीका बीच सम्वाद कार्यक्रम गरेको हो।

महिला संवाद कार्यक्रममा सहभागीहरुले महिलाका मुद्दामा पुरुष बढी जानकार हुनुपर्नेमा जोड दिएका छन्।

महिला संवादमा नेपाल पत्रकार महासंघ गण्डकीकी महासचिव जमुना शर्मा वर्षाले पत्रकार महिलाका अवसर र चूनौतिका विषयमा प्रस्तुति राखेकी थिइन्। उनले पत्रकारिता क्षेत्रमा महिलाका लागि अवसर धेरै भएपनि हिंसालगायत अन्य घटनाका कारण यो क्षेत्रमा टिक्न नसक्ने अवस्था रहेको बताइन्।

मिडियाका क्षेत्रमा पनि केही हिंसाका उजुरी परिरहेकाले पत्रकारिता क्षेत्रका श्रमिक महिला पनि समस्यासँग जुध्न बाध्य रहेको उनको भनाई थियो।

यसका लागि सम्बन्धित क्षेत्रले नै कडा कानुन बनाएर लाग्नुपर्नेमा उनको जोड थियो।

कार्यक्रममा राष्ट्रिय मानव अधिकार आयोगको कार्यालय, पोखराका प्रमुख नितु गर्तौलाले महिलाका विषयमा पुरुष जानकार नभएसम्म महिलाले न्याय नपाउने उल्लेख गरिन्।

महिला अधिकार विषयमा प्रस्तुति दिने क्रममा गर्तौलाले भनिन्, `महिला घरयासी काममा सिमित हुनुपर्छ भन्ने पुरुषको गलत सोचाइँका कारण घर छाडेर पर काम गर्न जाने महिलाले हिंसा भोग्नु परेको छ। कार्यालय वा बाहिर महिलाहरुलाई अझै ढुक्कसँग काम गर्ने वातावरण छैन। यसको न्यूनिरकरणका लागि पत्रकारको कमल र क्यामेरा चल्नुपर्छ।’

महिला संवादकी अर्की प्रस्तुतकर्ता किताबखाना तथा प्रदेश सञ्चार समन्वय शाखा, गण्डकी प्रदेशकी प्रमुख पार्वती लामिछानेले श्रमिक महिलाहरुको अधिकारका लागि सबै मिलेर अघि बढ्नुपर्नेमा जोड दिइन्।

`महिलाहरु दोहोरो अधिकारको लडाइँमा परेका छन्। महिला अधिकारको लडाइँमा रहेकाहरु श्रमिक महिलाको हक, अधिकारका लागि जुध्नुपरिरहेको छ। यस्तो अवस्थामा समाधानका लागि पुरुषहरु नै जागरुक र महिला अधिकारका विषयमा जानकार हुनुपर्छ।’

उनले कार्यक्रममा श्रमिक महिला दिवस र महिलाका सवाल विषयमा प्रस्तुतिकरण राखेकी थिइन्।

कार्यक्रममा जिल्ला प्रहरी कार्यालय कास्कीका प्रहरी निरीक्षक सरला ढकाल, ब्रोडकास्टिङ एसोसिएशन अफ नेपाल (बान) का उपाध्यक्ष दुर्गा अधिकारी, पोखरा उद्योग वाणिज्य संघकी महासचिव शोभा गौतम, लेखनाथ उद्योग वाणिज्य संघकी महासचिव जानुका पराजुली अधिकारीलगायतले महिलाका मुद्दामा राज्यसँगै पुरुष जानकार भएर लाग्नुपर्नेमा जोड दिएका थिए।

महिला अधिकारसँगै श्रमिक महिलाका अधिकारको पक्षमा पत्रकारको कलम र क्यामेरा धेरैभन्दा धेरै चल्नुपर्नेमा उनीहरुको जोड थियो।

नेपाल पत्रकार महासंघ कास्कीका अध्यक्ष माधवप्रसाल बरालको अध्यक्षतामा भएको महिला संवादमा उपाध्यक्ष माधव रेग्मीले स्वागत र कार्यक्रम संयोजक तथा उपाध्यक्ष कञ्चन थापाले संचालन गरेकी थिइन्।

मुख्यमन्त्री तथा मन्त्रिपरिषद्को कार्यालय, गण्डकी प्रदेशले कार्यक्रमलाई सहयोग गरेको थियो।