पत्रकार मृत्युको बिरोधमा पत्रकार महासंघद्वारा माइतीघर मण्डलासहित शाखाहरुमा प्रदर्शन

आफ्नो स्थापना दिवसलाई पत्रकार ‘हत्या’ र संचार गृह तथा संचारकर्मीमाथिको हमलाविरुद्धको प्रदर्शन

राजधानी काठमाडौँमा राजाबादीहरुले शुक्रबार आगजनी गरी पत्रकार सुरेश रजकको हत्या गरिएको भन्दै नेपाल पत्रकार महासंघले शनिबार बिहान काठमाडौँको माइतीघर मण्डलामा विरोध प्रदर्शन गरेको छ।

नेपाल पत्रकार महासंघको नेतृत्वमा शनिवार बिहान पत्रकारहरूले आन्दोलन सुरु गरेका छन्।

आन्दोलनका क्रममा राजावादीहरुको आगजनी गर्दा पत्रकार रजकको घरभित्र जलेर निधन भएको थियो।

भिडियो खिचिरहेको घरमा राजावादी प्रदर्शनकारीहरूले आगो लगाएसँगै पत्रकार रजकको जलेर मृत्यु भएको थियो।

यो घटनाको निन्दा गर्दै छानबिन र दोषीउपर कारबाहीको माग गर्दै आउने दिनमा मिडियामाथि प्रहार नगर्न समेत पत्रकार महासंघले माग गरेको छ।

नेपाल पत्रकार महासंघको नेतृत्वमा गरिएको प्रदर्शनमा प्रेस चौतारी नेपाल, नेपाल प्रेस युनियन, नेपाल आदिवासी जनजाति पत्रकार महासंघ (फोनिज), प्रेस सेन्टर नेपाल, सञ्चारिका समूह, मधेसी पत्रकार संघ, थारू पत्रकार संघ, नेपाललगायतका पत्रकार सम्बद्ध संघ संस्थाका पत्रकारले प्रदर्शनमा एक्यबद्धता जनाएका छन्।

घरभित्र जलाएर निधन भएका पत्रकार रजकको परिवारलाई उचित क्षतिपूर्तिसहित न्याय नदिएसम्म अभियान जारी रहने महासंघका पदाधिकारीहरूको भनाई छ।

कोणसभामा महासंघका पूर्व अध्यक्ष तारानाथ दाहालले पत्रकार रजकको मृत्यु नभई हत्या गरिएको बताए।

पूर्व राजावादीहरूले आतातायी ढंगले पत्रकार रजकको जलाएर हत्या गरेको उनको दाबी छ।

सो अवसरमा महासंघका वरिष्ठ उपाध्यक्ष दीपक आचार्य, महासचिव रामप्रसाद दाहाल, प्रेस चौतारी नेपालका अध्यक्ष गणेश पाण्डे, प्रेस सेन्टरका महासचिव सन्तोष पौडेल, रिपोर्टस क्लबका अध्यक्ष ऋषि धमलालगायतले प्रेस स्वतन्त्रताको पक्षमा सुरु गरिएको अभियानलाई सफल बनाएर छाड्ने बताए।

उनीहरूले यस अभियानमा सबै पत्रकारलाई एकताबद्ध भएर लाग्न आव्हानसमेत गरेका छन्।

महासंघको आफ्नो स्थापना दिवस मनाउन विभिन्न कार्यक्रम तय गरेको भएपनि बदलिएको परिस्थितिका कारण महासंघले स्थापना दिवसका पूर्वनिर्धारित संपूर्ण कार्यक्रम स्थगित गरी प्रदर्शनमा उत्रिएको पत्रकार महासंघले जनाएको छ।

स्थापना दिवसलाई पत्रकार ‘हत्या’ र संचार गृह तथा संचारकर्मीमाथिको हमलाविरुद्ध आन्दोलनका रूपमा शोक र विरोध सभाको रूपमा महासंघले मनाउने निर्णय गरेको महासंघका महासचिब रामप्रसाद दाहालले बिज्ञप्ति मार्फत जनाएका थिए।

महासंघले काठमाडौँमा जस्तै शोक र बिरोध कार्यक्रम गर्न आफ्ना शाखाहरुलाई परिपत्र गरेअनुसार पोखरालगायत विभिन्न जिल्ला शाखाहरुले प्रदर्शन गरेको समाचार छ।

पत्रकार महासंघ कास्की शाखालगायत देशका अन्य जिल्ला शाखाहरुले विरोध प्रदर्शन गरेको छ।

हत्या गरिएका पत्रकार रजकको शोकाकुल परिवारजनमा यहाँका पत्रकारहरुले समवेदना व्यक्त गरेका छन्।

सभामा सहभागीले प्रेस स्वतन्त्रताको पक्षमा प्लेकार्डसहित प्रदर्शन गरेका छन्।