पर्वतको बिहादी गाउँपालिकाद्वारा आगलागीबाट सावधानी अपनाउन अनुरोध

पर्वतको बिहादी गाउँपालिकाले सुक्खा मौसमको सुरुवातसँगै आगलागी तथा वन डढेलो जस्ता घटनाहरु घटी ठूलो क्षति हुने स्मरण गराएको छ।

यसतर्फ, विशेष सावधानी अपनाउन गाउँपालिकाले अनुरोधसमेत गरेको छ।

गाउँपालिकाले एक सूचना जारी गरी आगलागी तथा वन डढेलो घटनाहरु मानवीय त्रुटि तथा असावधानीका कारण हुने गरेको र त्यस्ता घटना हुन नदिन यदि भइहालेमा पनि कम क्षतिमा नियन्त्रण गर्नका लागि जनस्तरबाटै सावधानी अपनाउन आग्रह गरेको छ।ः

गाउँपालिकाका अध्यक्ष परविन गुरुङले आगलागीका घटना हुन सक्ने भएकाले सचेत रहन आग्रह गरेका छन्।

अध्यक्ष गुरुङले आफू सचेत हुँदा धेरै रोकिन सक्ने भन्दै सावधानी अपनाउनुपर्ने औंल्याएका छन्।

धेरैजसो आगलागी मानवसिर्जित रहेकाले पनि समयमा सबै सचेत हुनुपर्नेमा उनले जोड दिएका छन्।

बिहादी गाउँपालिकाले सावधानीका उपायबारे ६ बुँदे ध्यानाकर्षणसमेत सार्वजनिक गरेको छ।

आफ्नो घर, गोठ, कार्यालय, उद्योग तथा पसलहरुमा रहेका विद्युतीय तार तथा उपकरणहरु नियमित चेकजाँच गरी मर्मत संभार गर्नसमेत अनुरोध गरेको छ।

गाउँपालिकाले चुरोटका ठुटा, सलाई तथा लाइटरलगायतका सामाग्रीहरु जथाभावी नफाल्न र बालबालिकाको पहुँचमा नराख्न भनेको छ।

त्यस्तै, परालको टौवा तथा छिट्टै आगो फैलिने सामाग्रीहरु राखेको ठाउँ नजिकै आगोको कारोवार नगर्ने, झाडी नियन्त्रण गर्ने उद्देश्यले जथाभावी आगो र डढेलो नलगाउने आग्रह समेत गरेको छ।

खेतावारीमा काम गर्दा झाडी डढाउनु परेमा सुरक्षित रुपमा हावा नलागेको समयमा सावधानी पूर्वक काम गर्ने, कहीँ कतै आगलागीको घटना भएमा नजिकको प्रहरी चौकी तथा जनप्रतिनिधिहरुलाई खवर गरी सुरक्षाकर्मी, जनप्रतिनिधि तथा स्थानीय बासिन्दाहरुको सहयोगमा आगो निभाउन गाउँपालिकाले आग्रह गरेको छ।