पर्वतको महाशीला गाउँपालिका कार्यसम्पादन मूल्यांकनमा जिल्लामै पहिलो

पर्वतको महाशीला गाउँपालिका कार्यसम्पादन मूल्यांकनमा जिल्लामै पहिलो बनेको छ।

पर्वत जिल्लाका २ नगरपालिका र ५ गाउँपालिका गरी ७ स्थानीय तहमध्ये कार्यसम्पादन मुल्यांकनमा महाशीला पहिलो बनेको हो।

पर्वत जिल्लामै पहिलो बनेको महाशीला गाउँपालिका जिल्लाको दक्षिणी भेगमा पर्दछ।

राष्ट्रिय प्राकृतिक स्रोत तथा वित्त आयोगले सार्वजनिक गरेको मूल्यांकनको नतिजा अनुसार ७३.०६ अंक प्राप्त गरी महाशीला गाउँपालिका जिल्लामै पहिलो हुन सफल भएको हो।

गतवर्ष पनि पहिलो स्थान ओगटेको महाशीलाले यस वर्ष पनि पहिलो स्थानमै निरन्तरता दिएको हो।

त्यसैगरी, जिल्लाको उत्तरी भेगमा पर्ने जलजला गाउँपालिकाले ७०.०१ अंक प्राप्त गरी कार्यसम्पादन मुल्यांकनमा दोस्रो बनेको छ।

जिल्लाका २ नगरपालिकालाई पछि पार्दै भौगोलिक हिसाबले दुर्गममा रहेका गाउँपालिकाहरुमध्ये महाशीला पहिलो र जलजला दोस्रो बनेका हुन्।

कुश्मा नगरपालिकाले कार्यसम्पादन मूल्यांकनमा ६४.०७ अंक प्राप्त गर्दै जिल्लामा तेस्रो बनेको छ।

यसैगरी, फलेबास नगरपालिकाले ६०.०६ अंक ल्याउँदै चौथो बनेको छ।

त्यस्तै, मोदी गाउँपालिकाले ५९.०९ अंक ल्याउँदै पाँचौ स्थान ओगटेको छ।

यस्तै, पैयुँ गाउँपालिकाले ५८.०८ अंक जोडेर छैटौ स्थानमा आएको छ।

विहादी गाउँपालिकाले ५४.०८ अकं प्राप्त गर्दै अन्तिम सातौं स्थानमा समेटिएको छ।

आन्तरिक आम्दानीको प्राप्ति, विभाज्य कोषमा दाखिला भएको रकम, विनियोजन अनुसारको खर्च बजेट, बेरुजु, आवधिक योजना निर्माणको अवस्था, शैक्षिक र स्वास्थ्य गतिविधिलगायत मूल्यांकन गरेर नतिजा निकालिएको हो।