पाँचौं संस्करणको एनसेल टाइगर कप भलिबल सुरु

पहिलो खेलमा थाइल्याण्डको पाहूना टोली ट्राभल इन्क्वायरी युनाइटेडमाथि विभागीय एपीएफको जीत

जनसम्मत
माघ १२, २०८१, शनिबार

पाँचौं संस्करणको एनसेल टाइगर कप राष्ट्रिय तथा अन्तर्राष्ट्रिय क्लब महिला तथा पुरुष भलिबल प्रतियोगिता सुरु भएको छ।

टाइगर ग्रुप अफ पोखरा नेपालको आयोजनामा पोखरा रंगशालास्थित भलिबल कोर्टमा सुरु प्रतियोगितामा विभागीय एपीएफले जीत निकालेको छ।

एपीएफले पाहूना टोली ट्राभल इन्क्वायरी युनाइटेड प्यासन भलिबल क्लब थाइल्याण्डलाई पराजित गरेको हो।

त्यस्तै, न्यु डायमण्डले पनि खेलमा उत्कृष्ट पुनरागमन गर्दै विभागीय नेपाल पुलिसमाथि जीत निकाल्यो।

एपीएफले थाइल्याण्डको पाहूना टोलीलाई ३–२ को सेटले हरायो।

लगातार पहिलो २ सेट गुमाएको एपीएफले उत्कृष्ट पुनरागमन गर्दै ३–२ सेटमा जीत निकाल्न सफल भयो।

पहिलो सेटमा १२–७ को एपीएफको अग्रतालाई उल्टाउँदै ट्राभल इन्क्वायरीले जीत निकाल्यो।

इन्क्वायरीले दोस्रो सेटमा २५–२० को सहज जीत निकाल्यो।

तेस्रो र चौथो सेटमा उत्कृष्ट पुनरागमन गर्दै एपीएफले जित निकाल्दा खेल पाँचौं सेटमा धकेलिएको थियो।

एपीएफले तेस्रो सेट २५–१९ र चौथो सेट २५–२० ले जीत निकाल्यो।

पाँचौ सेटमा उत्कृष्ट प्रदर्शन गर्दै डिफेन्डिङ च्याम्पियन एपीएफले १५–७ को जीत निकाल्न सफल बन्यो।

फोटोः बसन्त शेर्पा