पोखराको मियापाटनमा अन्नपूर्ण क्लिनिकलको सुलभ फार्मेसी सेवा सुरु

पोखरा महानगरपालिका–१३ को मियापाटनस्थित अन्नपूर्ण क्लिनिकल प्रालिले शुक्रबारबाट सुलभ फार्मेसी सेवा प्रारम्भ गरेको छ।

विगत ६ वर्ष अघिदेखि सेवा दिँदै आएको प्रालिले सर्वसाधारणलाई होलसेल मूल्यमै औषधी उपलब्ध गराउन थालेको हो।

निजी क्षेत्रबाट देशमै पहिलोपटक यस खालको सेवा सुरुआत गरेको संचालक हिरामणि न्यौपानेको दाबी छ।

संचालक न्यौपानेले स्वास्थ्य क्षेत्रको संवेदनशीलता र नागरिकको कर्तव्य बोध गरी यस खालको सेवा सुरु गरेको जनाए।

उनले भने, ‘नाफामुखी भन्दा सेवामुखी भएर काम गरौं भनी नयाँ योजना ल्याएका छौँ। होलसेल मूल्यमै औषधी पाउँदा उपभोक्ताको पहुँच उपचारमा बढ्नुका साथै आर्थिक रुपमा पनि उनीहरुलाई फाइदा हुन्छ।’

पोखरा–१२ का वडाध्यक्ष सन्तोष बास्तोला र पोखरा–१३ का वडाध्यक्ष किरण बरालले एक समारोहबीच शुक्रबार बिहान संयुक्त रुपमा सुलभ फार्मेसी सेवाको एकसाथ उद्घाटन गरे।

पोखरा–१२ का वडाध्यक्ष बास्तोलाले व्यवसायसँगै सर्वसाधारणलाई सेवा दिने हेतुले यस खालका प्रयास हुनु प्रशंसनीय भएको उल्लेख गरे।

उनले भने, ‘यस खालका काम राज्यले गर्नुपर्ने हो। निजी क्षेत्रबाट सुलभ रुपमा सर्वसाधारणले औषधी पाउँदा उनीहरुको स्वास्थ्यमा पहुँच बढ्छ।’

पोखरा–१३, मियाँपाटन चोकमा रहेको अन्नपूर्ण क्लिनिकलमा विशेषगरी पोखरा महानगरका वडा नम्बर १०, १२ र १३ का सर्वसाधारण सेवा लिन पुग्ने गरेका छन्।

अन्नपूर्णमा प्रदेशकै पहिलो रेफरेन्स ल्याब युआरएलको शाखासहित भिडियो एक्सरे, ओपिडी, मुटुको भिडियो एक्सरे, सामान्य शल्यक्रिया लगायतका सेवा उपलब्ध छन्। बाँझोपनको समस्या सामाधानका निम्ति भारतको प्रतिष्ठित चेन इन्दिरा आइभीएफको काठमाडौं शाखासँग सहकार्य गरी यहाँ परामर्शसमेत दिने गरिएको छ।

अन्नपूर्णकी संचालिका संगीता बरालले उपभोक्ताको हितका लागि सुरु गरिएको यस सेवाबाट लाभ लिन आग्रह गरिन्।

शुक्रबारै, यहाँ निशुल्क ३ महिने संगिनी सुई लगाउने सेवासमेत प्रारम्भ गरिएको छ।

पोखरा–१३ को सहरी स्वास्थ्य केन्द्र तथा महानगरको स्वास्थ्य महाशाखाको समन्वयमा यो सेवा सुरु गरिएकको हो।