पोखराको लामाचौर–छोरेपाटन रुटमा हरित यातायात प्रणालीको पाइलोटिङ्

पोखराको लामाचौर–छोरेपाटन रुटमा हरित यातायात प्रणाली विकास परियोजनाको पाइलोटिङ् स्वरूप पहिलो चरणमा प्रविधि जडान गरिने भएको छ।

यस रुटमा ६ स्थानमा प्रविधिसहितको बसस्टप निर्माण र ४२ वटा बसहरूमा जीपीएस ट्रयाकिङ प्रविधि जडान गरिनेछ।

जसका लागि आवश्यक सामाग्रीहरू डिसेम्बर २० भित्र काठमाडौँ आइपुग्ने र त्यसलाई पोखरासम्म ल्याउन महानगरपालिकाले आवश्यक सहजीकरण गर्नेछ।

तोकिएका बसस्टपहरुमा इन्टरनेट र बिजुली बत्तिको व्यवस्थापन महानगरपालिका आफैले गर्नेछ।

पहिलो चरणमा.१८ करोड रुपैयाँबराबरको सामाग्रीहरू कोरियाले उपलब्ध गराउनेछ।

यसको पाइलोटिङ्संगै आगामी २ वर्षभित्र महानगरभित्रको संपूर्ण सार्वजनिक यातायातलाई प्रविधिमैत्री बनाइनेछ।

परियोजनाअन्तरगत पोखराका ८४ वटा बस रुटहरूमा १ हजार २ सय ८६ स्थानमा बस स्टप निर्माण गरिनेछ।
यसैगरी, ३ स्थानमा बस टर्मिनल निर्माण गरिनेछ।

नगर प्रमुख धनराज आचार्यका अनुसार पोखरामा चल्ने सार्वजनिक यातायातको सेवाबारे हरेक नागरिकहरूले डिजिटल माध्यमबाट जानकारी पाउनेछन्।

अहिलेजस्तो कुनैपनि स्थानमा लामो समयसम्म बस कुर्नुपर्ने छैन भने, चालकहरूले समेत जथाभाबी यात्रु चढाउन र ओराल्न पाउने छैनन्।

यस परियोजनाले पोखरामा समावेशी, दिगो, लचिलो, वातावरणमैत्री र प्रभावकारी यातायात प्रणालीको विकासमा टेवा पुग्ने विश्वास लिइएको छ।

परियोजनामा गणतन्त्र कोरियाको भूमि, पूर्वाधार र यातायात मन्त्रालय, कोरिया रेलमार्ग अनुसन्धान संस्थान, राष्ट्रिय यातायात विश्वविद्यालय कोरिया र तारकम को. लिमिटेडसहित विभिन्न दातृ निकायहरूले साझेदारी गर्नेछन्।

कोरियाको तर्फबाट तारकम को. लिमिटेडका बिजनेस विभागका निर्देशक कि होन किमले नगर प्रमुख आचार्यसँग बुधवार छलफल गरेका छन्।

किमले सबै सामाग्रीहरू परीक्षणपछि तयारी हालतमा रहेकाले एक महिनाभित्र नेपाल आइपुग्ने जनाएका छन्।