पोखराबाट अन्तराष्ट्रिय उडानको प्रयासस्वरुप पोखरा–छेन्दु उडान हुँदै

पोखरा अन्तराष्ट्रिय विमानस्थलबाट नियमित अन्तराष्ट्रिय उडानको प्रयासस्वरुप यही चैत ५ गते पोखराबाट मित्रराष्ट्र चीनको छेन्दुसम्म पहिलो व्यवसायिक चार्टर्ड उडान गरिने भएको छ।

लामो समयदेखि पोखरेली जनसमुदायको माग तथा सरकारी र निजी क्षेत्रको संयुक्त प्रयासबाट संचालनमा आएको पोखरा अन्तराष्ट्रिय विमानस्थल उद्घाटन भएको २ वर्षसम्म पनि नियमित अन्तराष्ट्रिय उडान हुन नसकेको अवस्थामा पहिलोपटक व्यवसायिक चार्टर्ड उडान गर्न लागिएको पोखरा पर्यटन परिषद्का अध्यक्ष तारानाथ पहारीले जानकारी दिएका छन्।

पहारीले भने, ‘पोखराबाट अन्तराष्ट्रिय विमान सुचारु गर्नको लागि पटक–पटक राज्यका सम्बन्धित उच्च निकायमा ध्यानाकर्षण गराउँदा पनि उडान सुचारु हुन नसक्दा हामी निजी क्षेत्रका पर्यटन व्यवसायीहरूले नै केही प्रयास गरौं भन्ने उद्देश्यका साथ पोखरा पर्यटन परिषदको नेतृत्वमा नेपालस्थित चिनियाँ राजदुतावास र सिचुवान एअरलायन्स सँगको सहकार्यमा यो अन्तराष्ट्रिय उडान गर्न लागिएको हो।

यसमा विशेषत: चीनस्थित चाइना ट्राभल्स इन्टरनेशनल छेन्दुले सुरुवाती उडानहरुमा सहकार्य गरिरहेको पहारीले बताए।

उनले नेपालस्थित चाइनीज ओभरसिज एशोसिएसनले पनि संयोजनकारी भूमिका निर्वाह गरेको जानकारी दिए।

यो उडानले पोखरा र समग्र गण्डकी प्रदेशकै पर्यटन चलायमान हुने विश्वास लिइएको पहारीको भनाई छ।

आगामी ३ महिनासम्मको अबधिमा करिब १ हजार २५० जना चिनियाँ पर्यटक चीनको सिचुवान प्रदेशबाट हवाई मार्गबाट सिधा पोखरा अन्तराष्ट्रिय विमानस्थलमा अवतरण गराउन प्रयासरत् रहेको चिनियाँ दुतावास, सिचुवान एअरलायन्स र चाइना ट्राभल इन्टरनेश्नल छेन्दुले जानकारी गराएको उनले बताए।

सुरुवाती चरणमा केही व्यवसायिक चार्टर उडानबाट सुरु गरेर यसलाई व्यवसायिक उडानमा परिणत गरी नियमित अन्तर्राष्ट्रिय उडान गर्ने कार्यको लागि पोखरा पर्यटन परिषद् र समग्र पर्यटन व्यवसायीहरू निरन्तर प्रयासमा लागिरहेको परिषद्ले जनाएको छ।

पोखराबाट नियमित अन्तराष्ट्रिय उडानको प्रयासस्वरुप पहिलोपटक व्यवसायिक चार्टर्ड उडान हुन लागेको बताए।

पोखरा महानगरपालिका प्रमुख धनराज आचार्यले अब चार्टर्ड मात्र नभै नियमित उडान हुनुपर्नेमा जोड दिए।

ठूलो जनसंख्या रहेको चीनबाट पर्यटक भित्राउन सकिएमा त्यसले पोखरासहित समग्र नेपालको पर्यटनमा महत्वपूर्ण योगदान पुग्ने उनको भनाई छ।

नेपालस्थित चिनिया राजदुतावासका डीसीएम वाङ सिनले पोखराबाट हुन लागेको व्यवसायिक चार्टर्ड उडानले पोखराको समग्र आर्थिक एवं पर्यटकीय विकासमा महत्वपूर्ण योगदान पुर्‍याउने बताए।

नेपाल चीनबीचको वर्षैदेखिको सम्बन्ध आगामी दिनमा थप प्रगाढ बन्दै जाने सिनको विश्वास छ।

उडानको तालिका अनुसार चैत्र ५ गते छेन्दुबाट बिहान १०.०० बजे १२७ जना चिनियाँ यात्रु लिएर विमान पोखरा विमानस्थल अवतरण गर्नेछ।

उक्त दिन दिउँसो १२.०० बजे १२७ जना पोखराबाट पर्यटन व्यवसायी छेन्दु प्रस्थान गर्नेछन्।

उक्त व्यवसायिक चार्टर्ड उडानमा पोखरा महानगरपालिकाका प्रमुख धनराज आचार्य, नेपाल पर्यटन बोर्ड गण्डकी प्रदेशका प्रमुख मणिराज लामिछाने, पोखरा भ्रमण वर्ष २०२५ कार्यसम्पादन समितिका संयोजक गोपीबहादुर भट्टराई, पोखरा पर्यटन परिषद्का अध्यक्ष तारानाथ पहारीलगायत सहभागी बन्ने जनाइएको छ।

पहिलो व्यवसायिक उडानका क्रममा हुने ७ रात ८ दिनसम्मको कार्यक्रममा विशेषत: सिचुवान प्रदेशको छेन्दु, लुझेउ, इमी, लिसन, छोङछिङ केन्द्रीत रही त्यहाँका पर्यटन विकास, बिस्तारबारे जनकारी लिइने परिषद्का महसचिव जीवनराज सापकोटाले जानकारी दिए।

त्यस्तै, नेपाल पर्यटन बोर्डको आयोजना तथा नेपाली महावाणिज्य दुतावास छेन्दुको सहकार्यमा छेन्दु र छाउछिङमा क्रमश: १९ र २२ मार्चमा नेपाल इभिङ र सेल्स मिसन गर्न लागिएको नेपाल पर्यटन बोर्ड पोखरा कार्यालयका प्रमुख मणिराज लामिछानेले जानकारी दिए।

‘लामिछानेले भने, ‘पोखराबाट अन्तराष्ट्रिय उडानका रुपमा गर्न लागिएको पहिलो व्यवसायिक चार्टर्ड उडानसँगै गरिने सेल्स मिसनका कार्यक्रमले पोखरासहित समग्र नेपालको पर्यटन प्रवद्र्धनमा महत्वपूर्ण टेवा पुग्नेछ।’

त्यस्तै, पोखरा महानगरपालिकाका प्रमुखको नेतृत्वमा लुझोउ शहरमा केही विशिष्ट व्यक्तिहरूसहितको समकक्षीसँग भेटवार्ता एवं महत्वपूर्ण विषयमा छलफल गरिने जनाइएको छ।

संचालनको २ वर्षसम्म पनि पोखराबाट नियमित अन्तराष्ट्रिय उडान हुन नसकेका अवस्थामा पहिलोपटक गर्न लागिएको व्यवसायिक चार्टर्ड उडान आँफैंमा महत्वपूर्ण रहेको पोखरा भ्रमणवर्ष–२०२५ कार्यसम्पादन समितिका संयोजक गोपीबहादुर भट्टराईले बताए।