पोखरामा डा श्रेष्ठलाई अवार्ड, पत्रकार शर्मालाई पुरस्कार

युआरएल फाउन्डेसनले यस वर्षको ‘लाइफ टाइम एचिभमेन्ट अवार्ड’ डा खगेन्द्रबहादुर श्रेष्ठलाई प्रदान गरेको छ।

त्यसैगरी, ‘राष्ट्रिय स्वास्थ्य पत्रकारिता पुरस्कार’ बाट पत्रकार जमुना ‘वर्षा’ शर्मालाई सम्मान गरेको छ।

युआरएलको ११ औं वार्षिकोत्सवको अवसरमा आइतबार आयोजना गरेको विशेष समारोहमा शिक्षाविद् जर्ज जोन, फाउन्डेसनका अध्यक्ष ठाकुरप्रसाद पन्तलगायतले श्रेष्ठ र शर्मालाई सम्मान गरेका हुन्।

गण्डकी प्रदेशको पहिलो रेफरेन्स ल्याब युनाइटेड रेफरेन्स ल्याबोरेटरी (युआरएल) ले स्थापना र प्रवद्र्धन गर्दै आएको फाउन्डेसनले उनीहरुलाई पुरस्कृत गरिएको हो।

ललितपुरको कुपन्डोल निवासी डा श्रेष्ठ पूर्वराजा वीरेन्द्र शाहका शाही चिकित्सकसमेत हुन् ।

८९ वर्षीय श्रेष्ठले नेपालसहित भारत, बेलायत, अमेरिकाबाट चिकित्साबारे अध्ययन र तालिम लिएका अवकाश प्राप्त जर्नेलसमेत हुन्।

उनले वीरेन्द्र सैनिक अस्पताल, बेलायत र वेल्सका अस्पतालमा सेवा गरिसकेका छन्।

पत्रकारिता पुरस्कारको राशि ३३ हजार ३ सय ३३ रुपैयाँ र सम्मानपत्र छ।

पत्रकार शर्मा राष्ट्रिय समाचार समिति र रेडियो जननीमा आवद्ध छिन्।

नेपाल पत्रकार महासंघ कास्की उपाध्यक्षसमेत रहेकी वर्षा आमसंचारमा स्नातकोत्तर छिन्।

कार्यक्रममा शिक्षाविद् जर्ज जोनले चिकित्सकहरु ईश्वरका रुप भएको उल्लेख गरे।

यो क्षेत्रले सामाजिक दायित्व निर्वाह गर्नु, पुरस्कार प्रदान गर्नु सराहनीय काम भएको जनाए।

सम्मानीत चिकित्सक डा श्रेष्ठले यस खालका सम्मानले मानिसमा आशाको संचार गर्ने उल्लेख गरे।

पुरस्कृत पत्रकार शर्माले कर्म गर्दै जाँदा समाजले मूल्यांकन गर्ने र निस्वार्थ सेवाको कदर हुने उल्लेख गरिन्।

प्रतिभा छनोट समिति संयोजक वद्रीविनोद प्रतीकले दुवै क्षेत्रमा योग्य र समाजले मूल्यांकन गरेका प्रतिभाहरु सम्मानीत भएको बताए।

समितिका सदस्यसमेत रहेका प्रयोगशालाविज्ञ सुशील थापाले प्रयोगशालाले गुणस्तर कायम गर्नु, व्यवसायसँगै सामाजिक दायित्व पनि देखिनेगरी निर्वाह गर्नु उदाहरणीय भएको विचार राखे।

युआरएल फाउन्डेसनका अध्यक्ष ठाकुरप्रसाद पन्थको अध्यक्षतामा भएको कार्यक्रममा गण्डकीकी प्रेस रजिष्ट्रार विमला भण्डारी, प्रदेश जनस्वास्थ्य प्रयोगशालाका महानिर्देशक मनमोहन मिश्र, पूर्वपुरस्कृत व्यक्तित्व आरजू विष्ट सल्यानी, युआरएलका प्रबन्ध निर्देशक गणेशप्रसाद कोइराला, युआरएलका संचालक वसन्त पंगेनीलगायतले बोलेका थिए।

गत वर्षबाट प्रदान गर्न थालिएको ‘लाइफ टाइम एचिभमेन्ट अवार्ड’ बाट पहिलो पटक पोखरा स्वास्थ्य विज्ञान प्रतिष्ठानका संस्थापक उपकुलपति प्राडा बुद्धिबहादुर थापालाई सम्मान गरिएको थियो।

सुरुआतमा युआरएल पत्रकारिता पुरस्कारका रुपमा संचालित पुरस्कार भने गत वर्षबाट ‘राष्ट्रिय स्वास्थ्य पत्रकारिता पुरस्कार’ मा रुपान्तरण गरिएको हो।

यो पुरस्कारबाट गत वर्ष दीपेन्द्र श्रेष्ठ सम्मानीत भएका थिए।

‘राष्ट्रिय स्वास्थ्य पत्रकारिता पुरस्कार’ र ‘लाइफ टाइम एचिभमेन्ट अवार्ड’ प्रदान गर्न प्रेस स्वतन्त्रता सेनानी बदीविनोद प्रतीकको संयोजकत्वमा बनेको समितिले सर्वसम्मत अवार्ड र पुरस्कार दिने प्रतिभा छनोट गरेको हो।