पोखरामा पुरुषोत्तम न्यौपाने सांगीतिक साँझ हुँदै

पोखरामा पुरुषोत्तम न्यौपाने सांगीतिक साँझ गरिदैँछ।

राष्ट्रिय लोक तथा दोहरीगीत प्रतिष्ठान नेपालले पर्सि चैतको २२ गते (शुक्रबार) साँगीतिक साँझको आयोजना गर्न लागेको हो।

आयोजक राष्ट्रिय लोक तथा दोहरीगीत प्रतिष्ठानले पत्रकार सम्मेलन गरी सांगीतिक साँझको विविध पक्षबारे जानकारी गराएको हो।

पोखरा सभागृहमा शुक्रबार दिउँसो ३ बजेदेखि ८ बजेसम्म वरिष्ठ लोक दोहोरी गायक पुरुषोत्तम न्यौपाने एकल साँझका प्रस्तुति दिने प्रतिष्ठानकी

अध्यक्ष रिता थापामगरले पत्रकार सम्मेलनमा जानकारी दिइन्।

प्रतिष्ठानले नारायण रायमाझीको एकल सांगीतिक साँझपछि यो दोस्रो पटक आयोजना गर्न लागेको हो।

अध्यक्ष थापामगरका अनुसार एकल साँझमा गायक न्यौपानेले १८ वटा प्रत्यक्ष रुपमा प्रस्तुत गर्नेछन्।

लोक दोहोरी गायक न्यौपाने आफैले गाएका चर्चित गीतहरु ‘झिलझिल सितारा’, ‘ऐना हेरेर’, ‘फूलको बासना’, ‘श्रीखण्ड चन्दन’, ‘मिर्मिमुनी काली थुनेको’, ‘रुन्छनी मन किन रुँदैन’, ‘डाँडैमा पिपल सारेर’, ‘सरर पानी घट्टामा’, ‘घामजस्तो चम्किलो जुन हुँदैन’, ‘एउटा बाचा गर्छु’, ‘यो मन किन रुन्थ्यो’ लगायतका लोकगीतहरु एकल साँझमा प्रस्तुत गर्नेछन्।

त्यसैगरी, एकल साँझमा ‘आज मुग्लिन झरौँ’, ‘मोहनी तिम्रो बोलीमा’, मायाले मार्‍यो’, ‘बेलटारीमै फूलमै रानी’, ‘ढुंगेधारामा’, ‘मलेवा सरर’, ‘देउरालीमा ध्वजा’, पूर्वैमा झ्याल राखे’, र ‘कमल फूल’ लगायतका लोकगीतहरु प्रस्तुत गर्नेछन्।

साथै, उक्त साँझ गायक न्यौपानेको जीवनीमा तयार पारिएको वृत्तचित्र समेत प्रदर्शन गरिने पत्रकार सम्मेलनमा बताइएको छ।

लोक गीत मात्र नभई गायक न्यौपानेले गाएका भजन कीर्तन र तीजका गीतहरु पनि उत्तिकै चर्चामा छन्।

वि.सं. २०२९ भदौ २५ गते स्याङ्जाको कालीगण्डकी गाउँपालिका वडा नं ५, वलाम बेलटारीमा जन्मिएका लोकगायक न्यौपानेका करिब १ हजार भन्दा बढी गीतहरु रेकर्ड भएको बताइएको छ।

न्यौपानेले ०४६ सालमा पहिलो पटक ‘वलाम देवीथान’ बोलको गीत गाएर आफ्नो लोक गीतको गायन यात्रा थालेका हुन्।

राष्ट्रिय लोक तथा दोहरीगीत प्रतिष्ठान नेपालका पूर्व अध्यक्षसमेत रहेका गायक न्यौपाने हाल रेडियो नेपालको क्षेत्रीय प्रशारण केन्द्र पोखरामा कार्यक्रम अधिकृतका रुपमा कार्यरत छन्।

न्यौपानेले २०४६ मा रेडियो नेपालबाट स्वर परीक्षण उत्तीर्ण गरेका थिए।