पोखरास्थित कास्की कारागारका कैदी बन्दीको सित्तैमा जाँच र औषधी

पोखरास्थित कास्की कारागारमा रहेका बिरामी कैदी बन्दीको बुधबार सित्तैमा जाँचसहित औषधी वितरण गरिएको छ।

युआरएल फाउन्डेसन नेपाल र पोखरा स्वास्थ्य विज्ञान प्रतिष्ठानको प्राविधिक सहयोगमा कारागारमा निशुल्क शिविर गरिएको हो।

गत शनिबार कैदी, बन्दीहरुको सुगर, युरिक, एसिड थाइराइड जाँचका लागि नमुना संकलन गरिएकोमा बुधबार पोखरा स्वास्थ्य विज्ञान प्रतिष्ठानका चिकित्सकबाट स्वास्थ्य जाँच, परामर्शसहित आवश्यक औषधी वितरण गरिएको हो।

शिविरमा २ सय ६० जनाको सित्तैमा जाँच गरिएको छ।

कास्की कारागारमा कैदी, बन्दी, सुरक्षाकर्मीसहित करिब ९ सय जनाको बसोबास छ।

शिविरमा सहभागी पोखरा स्वास्थ्य विज्ञान प्रतिष्ठानका वरिष्ठ फिजिसियन डा कृष्णराज अधिकारीका अनुसार कारागारमा रहेका कैदी बन्दीका विभिन्न खाले समस्या देखिएका छन्।

डा अधिकारीले भने, ‘सबैजसोमा कोलेस्ट्रोल निकै उच्च देखियो। धेरैले मानसिक समस्या जस्तोः निद्रा नलाग्ने, छटपटी हुने गरेको सुनाए। कहिल्यै जाँच गर्न नपाएका मधुमेह, प्रेसर निकै उच्च भएकाहरु पनि भेटियो।’

चिल्लो खाना, व्यायामको कमी, आवश्यक परामर्शको अभाव, कसरत नहुनुका साथै बेलैमा उपचारको व्यवस्था नहुँदा यस्तो अवस्था देखिएको डा अधिकारीले औंल्याउँछन्।

युआरएल फाउन्डेसनका अध्यक्ष ठाकुरप्रसाद पन्थले स्वास्थ्य उपचारको निकै आवश्यक रहेका कैदी बन्दीहरुको परीक्षणसहित औषधीसमेत वितरण गरिएको उल्लेख गरे।

‘हामीले पोखरा स्वास्थ्य विज्ञान प्रतिष्ठानसँग मिलेर शिविर आयोजना गरेका हौं। सामाजिक उत्तरदायित्व निर्वाह गर्ने क्रममा यहाँ आइपुगेका हौँ। करिब ३ लाखको औषधीसमेत वितरण गरिएको छ’, अध्यक्ष पन्तले भने।

युआरएल फाउन्डेसनका सचिव गणेशप्रसाद कोइरालाले पहिलो पटक यसरी शिविर गरिएको जनाए।

कारागारमा दन्तसहित विभिन्न रोगहरुको स्वास्थ्य जाँच गर्ने शिविर जरुरी रहेको उनले औंल्याए।

कैदी बन्दीहरुले स्वास्थ्य लाभ लिन यस्ता शिविरले सघाउने कारागार प्रमुख राजेन्द्र शर्माको भनाई छ।

उनले सीमित स्रोतका बाबजुद पनि आफूहरु कारागारमा स्वास्थ्य सेवालाई प्रभावकारी बनाउन लागिपरेको उल्लेख गरे।