पोखरा विमानस्थलबाट हिमालय एअरलाइन्सको अन्तर्राष्ट्रिय उडान सुरू

पोखरा अन्तर्राष्ट्रिय विमानस्थलबाट अर्को नयाँ नियमित अन्तर्राष्ट्रिय उडान सुरू भएको छ।

हिमालय एअरलाइन्सले ल्हासाबाट पोखरामा यात्रु ओराल्दै नियमित अन्तर्राष्ट्रिय उडान सुरू गरेको हो।

हिमालय एअरलाइन्सले नियमित उडान थालेको हो।

ल्हासाबाट १ सय ०७ जना यात्रु बोकेर आएको हिमालयको जहाज दिउँसो पौने २ बजे पोखरा विमानस्थलमा अवतरण गरेको हो।

हिमालय एअरलाइन्सको एज ९ ७३२ ल्हासादेखि पोखरा आइपुग्न १ घण्टा ३४ मिनेट लागेको थियो।

विमान भोलि बिहान पोखराबाट ल्हासाका लागि उड्नेछ।

ल्हासाबाट पोखरा आएका पर्यटकहरुलाई पोखरामा स्वागत गरिएको छ।

गण्डकी प्रदेशका मुख्यमन्त्री सुरेन्द्रराज पाण्डे, पोखरा महानगर प्मुख धनराज आचार्य, कास्कीका प्रमुख जिल्ला अधिकारी भरतमणि पाण्डे, पोखराका पर्यटन तथा व्यवसायीहरुले पोखरा आएका यात्रुलाई खादा तथा माला लगाउदै स्वागत गरे।

कार्यक्रममा नेपाल सरकारका संस्कृति, पर्यटन तथा नागरिक उड्डयन राज्य मन्त्री अरुणकुमार चौधरी, गण्डकी प्रदेशका पर्यटन मन्त्री मित्रलाल बस्याल, नेपालका लागि जनवादी गणतन्त्र चीनका राजदूत चेन सोङ, पोखरा महानगरपालिकाका मेयर धनराज आचार्य, नेपाल नागरिक उड्डयन प्राधिकरणका उपमहानिर्देशक देव चन्द्रलाल कर्ण, ल्हासास्थित नेपाली महावाणिज्यदूतावासका महावाणिज्यदूत लक्ष्मीप्रसाद निरौलालगायतको उपस्थिति थियो।

हिमालय एअरलाइन्सका अध्यक्ष, झोउ एनयोङ, उपाध्यक्ष–प्रशासन तथा हिमालय एअरलाइन्स्का अधिकारीहरूले स्वागत गरेका थिए।

हिमालय एअरलाइन्स आफ्ना यात्रुहरूलाई गुणस्तरीय सेवा र सुरक्षित यात्राको अनुभव प्रदान गर्न सदैव प्रतिबद्ध रहेको कम्पनीले जनाएको छ।

यो मार्गमा उडान शुभारम्भ भएसँगै ग्रीष्मकालीन सिजनमा पनि पर्यटन बढ्ने अपेक्षा गरिएको छ।

पोखरालाई ल्हासासँग जोड्न सातामा एक पटक उडान गर्नेगरी उडान तालिका सार्वजनिक गरिएको हिमालय एयरलाइन्सले जनाएको छ।

ल्हासा–पोखरा उडानले नेपाललाई विश्वसँग जोड्ने, सांस्कृतिक आदान–प्रदानलाई सहज बनाउने र दुवै गन्तव्यहरूको पर्यटन वृद्धिमा सहयोग गर्ने एअरलाइन्सको विश्वास छ।

दुई राष्ट्रका नागरिकबीचको सम्बन्धलाई मजबुद् बनाउने, पर्यटन र व्यापारलाई प्रवर्द्धन गर्ने उद्देश्यले संचालन भएको हिमालय एअरलाइन्सको व्यवसायिक उडान सफल हुने विश्वास लिइएको छ।

नयाँ रुटको परिचयसँगै हिमालयले उच्च सुरक्षा मापदण्ड कायम गर्दै यात्रुहरूका लागि अविस्मरणीय यात्रा अनुभवहरू सिर्जना गर्ने लक्ष्य राखेको छ।