प्रतिनिधिसभा हाउसबाट आमसंचार परिषद् विधेयक स्वीकृत

प्रतिनिधिसभाबाट ‘आमसंचार परिषद् विधेयक, २०८१’ स्वीकृत भएको छ।

प्रतिनिधिसभाको आज (मंगलबार) को बैठकले ‘आमसंचार परिषद् विधेयक, २०८१ माथि विचार गरियोस्’ भन्ने प्रस्तावलाई सर्वसहमतिले स्वीकृत गरेको छ।

आजको बैठकमा विधेयकमाथि उठेका प्रश्नको जवाफमा संचार तथा सूचना प्रविधिमन्त्री पृथ्वीसुब्बा गुरूङले जवाफ पेश गर्दै प्रेस काउन्सिलले गरिरहेका कामलाई अझ प्रभावकारी बनाउनका लागि प्रस्तावित परिषद्को भूमिका महत्वपूर्ण रहने औंल्याए।

‘विधेयकमा प्रेस काउन्सिलले गरिरहेको काम अझ प्रभावकारी बनाउन यो परिषद्को भूमिका रहनेछ। अधिकारका विषय समितिमा थप छलफल गरिनेछ। आचारसंहिता र कारबाहीका कुरामाथि पनि छलफल चल्नेछ। परिषद्लाई स्वतन्त्र मर्यादित संस्थाका रूपमा परिकल्पना गरिएको छ। सदनमा उठेका विषयमाथि थप संशोधन गरिनेछ। समितिहरूबाट आउने विषयहरू पनि समेटिनेछ’, उनले भने।

सैद्धान्तिक छलफलका क्रममा सांसदहरूले राखेको धारणा मननीय र ग्रहणयोग्य रहेको मन्त्री गुरूङको भनाई थियो।

यसअघि, मिडिया काउन्सिल विधेयकका रूपमा दर्ता गरिएकामा त्यसलाई नेपालीकरण गरी ‘आमसंचार परिषद् विधेयक’ का रूपमा ल्याइएको उनको भनाई थियो।

‘राष्ट्रिय आमसंचार नीति, २०७३’ को कार्यान्वयनका लागि यो विधेयक जरूरी रहेको समेत मन्त्री गुरुङले उल्लेख गरे।

नीतिले मार्ग निदृष्ट गरेका विषय समयसापेक्ष बनाउन विधेयकले भूमिका खेल्ने उनले बताए।

पहिले छापा माध्याम बढी रहेको अहिले विद्युतीय माध्यामहरूको संख्या बढेको, प्रेस काउन्सिलले गरिरहेका कामलाई अझ प्रभावकारी बनाउन यो परिषद्को भूमिका रहने उनको भनाई थियो।

सभामुख देवराज घिमिरेले उक्त विधेयकमा संशोधन पेश गर्न ‘प्रतिनिधिसभा नियमावली–२०७९’ को नियम ११२ बमोजिम संशोधन पेश गर्न चाहने सांसदले विधेयक शाखा सिंहदरवारमा दिनसक्ने जानकारी गराएका छन्।

प्रतिनिधिसभाको अर्को बैठक यही फागुन २१ गते (बुधबार) दिनको १ बजे बस्नेछ।