प्रेस सेन्टर नेपालले पाँचौँ महाधिवेशनको मिति तोक्यो

नेकपा माओवादी केन्द्रनिकट पत्रकारहरूको संगठन प्रेस सेन्टर नेपालले आफ्नो पाँचौँ राष्ट्रिय महाधिवेशनको मिति तोकेको छ।

मंगलबार काठमाडौँमा बसेको प्रेस सेन्टर नेपालको केन्द्रीय समिति बैठकले संगठनको पाँचौँ राष्ट्रिय महाधिवेशन आगामी चैत १६ र १७ गते काठमाडौँमा गर्ने निर्णय गरेको हो।

प्रेस सेन्टर नेपालका महासचिव सन्तोष पौडेलका अनुसार संगठनको २१ ओैंँ स्थापना दिवसका अवसरमा बसेको बैठकले महाधिवेशन सम्पन्न गर्न सचिवालय र विभिन्न उपसमितिसमेत गठन गरेको छ।

उनका अनुसार महाधिवेशन सम्पन्न गर्न मूल व्यवस्थापन समिति, प्रतिवेदन लेखन समिति, निर्वाचन समिति, अध्यक्ष मण्डल, प्रचार तथा प्रकाशन समिति, आर्थिक व्यवस्था समिति, सदस्य तथा प्रतिनिधि अभिलेखीकरण तथा अनुगमन समिति, अतिथि सत्कार समितिलगायत समिति बनाइएको छ।

नेकपा माओवादी केन्द्रका उपाध्यक्ष तथा प्रचार विभाग प्रमुख अग्नि सापकोटाको प्रमुख उपस्थितिमा सम्पन्न बैठकमा केन्द्रीय अध्यक्ष विष्णु सापकोटाले प्रस्तुत गरेको प्रस्ताव र एजेन्डामा सहभागी सदस्यहरूले धारणा राखेपछि सर्वसम्मत पारित गरेको थियो।

बैठकले समसामयिक विषयमा १५ बुँदे काठमाडौँ घोषणापत्र पनि जारी गरेको छ।