‘प्रेस स्वतन्त्रता संकुचनको कुनैपनि विधेयक मान्य हुँदैन’

सरकारले संघीय संसदमा दर्ता गराएको सामाजिक सञ्जाल संचालन, प्रयोग तथा नियमनसम्बन्धी केही प्रावधानप्रति नेपाल पत्रकार महासंघले ध्यानाकर्षण भएको जनाएको छ।

महासंघले बुधबार एक प्रेस विज्ञप्ति जारी गर्दै प्रेस तथा अभिव्यक्ति स्वतन्त्रता संकुचन र नियन्त्रण गर्ने कुनैपनि कानुन स्वीकार्य नहुनेतर्फ महासंघको गंभीर ध्यानाकर्षण भएको जनाएको हो।

महासंघका महासचिव रामप्रसाद दाहालद्वारा हस्ताक्षरित प्रेस विज्ञप्तिमा भनिएको छ, ‘अगुवा नागरिक संस्था महासंघलगायतका सरोकारवाला पक्षसँग सामान्य परामर्श र छलफलसमेत नगरी सरकारले प्रेस तथा अभिव्यक्ति स्वतन्त्रतामा आघात पार्ने केही प्रावधान समावेश गरी विधेयक अगाडि बढाएकोमा महासंघले गंभीर असहमति र आपत्ति प्रकट गर्दछ।’

प्रेस तथा अभिव्यक्ति स्वतन्त्रता कुण्ठित पार्ने प्रावधान सच्याएर मात्र विधेयक अगाडि बढाउन पत्रकार महासंघले सरकार र संसदसमक्ष आग्रह गरेको छ।

‘महासंघलगायत सरोकारवाला पक्षसँग गहिरो संवादमार्फत विश्वव्यापी मानवअधिकार, प्रेस तथा अभिव्यक्ति स्वतन्त्रताको मूल्य मान्यता, हाम्रो संवैधानिक प्रावधान र प्रचलित अभ्याससँग तालमेल मिल्नेगरी प्रेस तथा अभिव्यक्ति स्वतन्त्रता कुण्ठित पार्ने प्रावधान सच्याएर मात्र विधेयक अगाडि बढाउन पत्रकार महासंघले सरकार र संसदसमक्ष आग्रह गर्दछ’, विज्ञप्तिमा उल्लेख छ।

हेरौं, विज्ञप्ति