म्याग्दीका दृष्टिविहिन विद्यार्थीहरुलाई प्रेस सेन्टरको सहयोग

प्रेस सेन्टर नेपाल, म्याग्दीले दृष्टिविहिन विद्यार्थीहरुलाई शैक्षिक सामाग्री वितरण गरेको छ।

प्रेस सेन्टर नेपालको २१ औं स्थापना दिवसको अवसरमा रघुगंगा गाउँपालिका–३ मौवाफाँटमा रहेको ज्ञानोदय माविमा संचालित दृष्टिविहीन स्रोत कक्षाका विद्यार्थीहरुलाई शैक्षिक सामाग्री सहयोग गरेको हो।

प्रेस सेन्टर नेपाल म्याग्दी शाखाले स्रोत कक्षामा रहेका १० जना दृष्टिविहीन बालबालिकालाई कपी, कलम वितरण गरेको हो।

कार्यक्रममा प्रेस सेन्टर म्याग्दीका अध्यक्ष कमल खत्री, संगठनका गण्डकी प्रदेश कमिटीका महासचिब सन्तोष गौतम, विद्यालय व्यवस्थापन समितिका सदस्य विमल भण्डारी, विद्यालयका प्रधानाध्यापक बिजय शर्मालगायतले विद्यार्थीहरुलाई स्टेशनरी वितरण गरे।

त्यसैगरी, सोही अवसरमा विद्यालयले आयोजना गरेको तहगत बक्तृत्वकला प्रतियोगितामा प्रथम, द्धितीय, तृतीय र सान्त्वना हुने विद्यार्थीहरुलाई समेत प्रेस सेन्टरले पुरस्कार प्रदान गरेको छ।

विद्यालयमा आयोजित कक्षा ६–१० सम्मका विद्यार्थीहरुले सहभागीता जनाएको ‘शिक्षामा सूचना तथा प्रविधिको प्रयोग’ बिषयक बक्तृत्वकला प्रतियोगितामा सुप्रिया भण्डारी प्रथम, सुमी तिलिजा द्धितीय, रश्ना शाही तृतीय र रितिका शर्माले सान्त्वना पुरस्कार पाए।

त्यसैगरि कक्षा ३ देखि ५ सम्मका विद्यार्थीहरुले सहभागीता जनाएको ‘मेरो विद्यालय’ विषयक बक्तृत्वकला प्रतियोगितामा कृतिका खत्री प्रथम, सन्चित सुवेदी द्धितीय, अनुस्का विक तृतीय र करुणा खत्रीले सान्त्वना पुरस्कार पाए।

प्रतियोगितामा २४ जना विद्यार्थीहरुको सहभागीता थियो।

कार्यक्रममा प्रेस सेन्टर गण्डकी प्रदेश समितिका महासचिब गौतम र जिल्ला अध्यक्ष खत्रीले फरक क्षमताका विद्यार्थीहरुको अध्ययनमा सहयोग पुगोस भन्ने उदेश्यले स्थापना दिवसको अवसरमा शैक्षिक सामाग्री वितरण गरिएको बताए।

विद्यालयले आयोजना गरेको बक्तृत्वकला प्रतियोगिताले विद्यार्थीहरुमा लुकेर रहेको क्षमता प्रस्फुटन गराउन सहयोग गर्नेमा जोड दिए।

विद्यालयका प्रधानाअध्यापक शर्माको अध्यक्षतामा भएको कार्यक्रममा निर्णायक मण्डलका संयोजक दामोदर रिजालले कार्यक्रमबारे प्रकाश पारेका थिए।

अतिरिक्त क्रियाकलाप संयोजक शिक्षक अर्जुन पौडेलले कार्यक्रमको संचालन गरेका थिए।