म्याग्दीको मंगला गाउँपालिका कार्यसम्पादन मूल्यांकनमा पहिलो

म्याग्दी जिल्लाको पालिकाभरी मंगला गाउँपालिका कार्यसम्पादन मूल्यांकनमा पहिलो बनेको छ।

म्याग्दीका ६ वटा स्थानीय तहमध्ये मंगला गाउँपालिका स्थानीय सरकारहरूको कार्यसम्पादन मूल्यांकन नतिजामा जिल्लाको पहिलो बनेको हो।

राष्ट्रिय प्राकृतिक स्रोत तथा वित्त आयोगले आर्थिक वर्ष ०८०/०८१ मा गरेको कार्यसम्पादन मूल्यांकनमा म्याग्दीका ६ वटा स्थानीय तहमध्ये मंगला गाउँपालिका पहिलो बनेको हो।

आयोगले विभिन्न १७ वटा सूचकमा १०० पूर्णाङ्क राखेर गरेको मूल्यांकन गरेर माघ ३० गते सार्वजनिक गरेको नतिजाअनुसार, मंगला गाउँपालिकाले जिल्लाका ६ वटा स्थानीय तहमध्ये सबैभन्दा बढी ६९.५ अंक पाएको छ।

यसपटक म्याग्दीका सबै स्थानीय तहले विगतका बर्षको तुलनामा नतिजामा सुधार गरेका छन्।

बेनी नगरपालिकाले ६७.२७ अंक, रघुगंगा गाउँपालिकाले ६९.४ अंक, मालिका गाउँपालिकाले ६८.७ अंक, अन्नपूर्ण गाउँपालिकाले ६० अंक, धवलागिरी गाउँपालिकाले ४०.९ अंक पाएको छ।

अघिल्लो आर्थिक वर्षमा कार्यसम्पादन मूल्यांकनमा क्रमश मंगला गाउँपालिकाले ३४.८२ अंक, बेनी नगरपालिकाले ३५.२७ अंक, रघुगंगा गाउँपालिकाले २०.६० अंक, मालिका गाउँपालिकाले ३४.८२ अंक, अन्नपूर्ण गाउँपालिकाले २७.६० अंक पाएका थिए।

आयोगले गरेको मूल्यांकन नतिजाको आधारमा स्थानीय तहलाई संघीय संचित कोष तथा प्रदेश संचित कोषबाट प्रदान गर्ने वित्तीय समानीकरण अुनदान अन्तर्गत कार्यसम्पादन मूल्यांकनका आधारमा अनुदान सिफारिस गर्ने भएकाले पनि स्थानीय तहले कार्यसम्पादनलाई निकै महत्वका साथ हेर्ने गरेका छन्।

आयोगले प्राकृतिक स्रोत तथा वित्त आयोगले प्रदेश तथा पालिकाको कार्यसम्पादन मूल्यांकन कार्यविधि–२०७८ अनुसार अंक प्रदान गर्दछ।

असार १० भित्र बजेट पेस गरे/नगरेको, असार मसान्तभित्र बजेट पास गरे/नगरेको, वार्षिक बजेट समीक्षा गरी कार्तिक मसान्तभित्र सार्वजनिक गरे/नगरेको, विनियोजित रकमअनुसार खर्चको अवस्था, बेरूजु, आवधिक योजनाको तर्जुमा, कक्षा १ देखि ८ सम्म विद्यार्थी भर्ना दरलाई वित्त आयोगले सूचकको रूपमा मापन गरेको छ।

त्यसैगरी, कक्षा ८ को तुलनामा कक्षा ९ मा विद्यार्थी टिकाउ दर, सामुदायिक विद्यालयबाट कक्षा १० मा १ दशमलव ६ वा सोभन्दा बढी जीपीएप्राप्त गरेका विद्यार्थी प्रतिशत, ४ पटक गर्भजाँच गरेको महिलाको अनुपातलगायत १७ सूचकका आधारमा वित्त आयोगले अंक प्रदान गर्छ।