म्याग्दीको मालिका–२, रुममा ‘एक घर, एक धारा’

म्याग्दीको मालिका गाउँपालिका–२ रुममा ‘एक घर, एक धारा’ सहितको ३ वटा खानेपानी आयोजना निर्माण भएको छ।

नेपाल पानीको लागि स्वास्थ्य (नेवा) संस्था, मालिका गाउँपालिका र उपभोक्ताको १ करोड ८७ लाख ९० हजार ९८६ रुपैयाँको लागतमा निर्माण भएका ३ वटा आयोजनाबाट ४०९ घरधुरी लाभान्वित भएका छन्।

ठूलोरुममा २७०, बिलबाङमा ६४ र कलान भनारी खानेपानी तथा सरसफाई आयोजनाबाट ७३ घरधुरीमा निजी धारा जडान गरेर खानेपानी वितरण गरिएको हो।

यसअघि, सार्वजनिक धारामार्फत खानेपानी वितरण हुने गरेको थियो।

घर, आगनकै धारामा नियमित पानी आपूर्ति हुन थालेपछि उपभोक्ताको समयको बचत भएको छ।

धाराबाट पानी ओसार्दा स्थानीयवासीको हुने दुःख र झञ्जट हटेको छ।

स्थानीयबासीको दैनिकी र जिवनशैली परिवर्तन आएको छ।

स्वास्थ्य र सफा खानेपानी आपूर्ति हुन थालेपनि दुषित पानीका कारण हुने स्वास्थ्य समस्या न्यूनीकरण हुने अपेक्षा गरिएको छ।

खानेपानीको व्यवस्थित र मितव्ययी प्रयोगका लागि मिटर जडान गरी हेरालु राखिएको छ।

१ करोड १५ लाख ७ हजार ४२४ रुपैयाँको लागतमा निर्माण भएको ठूलोरुम खानेपानी तथा सरसफाई आयोजनामार्फत १ हजार ४२३ जनसंख्या लाभान्वित भएका छन्।

त्यसैगरी, ३६ लाख ६५ हजार ८०४ रुपैयाँको लागतमा निर्माण भएको बिलवाङ खानेपानी तथा सरसफाई आयोजनाबाट ३६२ जनसंख्या लाभान्वित भएका छन्।

कुल ३५ लाख ७४ हजार ७५८ रुपैयाँको लागतमा निर्माण भएको कलात भनारी खानेपानी तथा सरसफाइ आयोजनामार्फत ७३ घरधुरीका ३४४ जनसंख्या लाभान्वित भएका छन्।

४११ जना विद्यार्थी अध्ययनरत विद्यालयमा १ वटा धारा जडान भएको छ।

नेवासँगको साझेदारीमा मालिका गाउँपालिकामा यस वर्ष ६ वटा ‘एक घर, एक धारा सहितको खानेपानी आयोजना निर्माण भएको गाउँपालिकाका अध्यक्ष बेगप्रसाद गर्बुजाले बताएका छन्।

वडा नम्बर २ मा निर्माण भएका ३ वटै आयोजनाको शुक्रबार गाउँपालिका अध्यक्ष गर्बुजा, उपाध्यक्ष लक्ष्मीदेवी घर्ती पुन र वडाध्यक्ष उदयबहादुर बुढाथोकीले उद्घाटन गरेका हुन्।