म्यान्मारले जित्यो ४ देशीय अन्तर्राष्ट्रिय महिला च्याम्पियनसीपको उपाधि

पाहूना टोली म्यान्मारले ४ देशीय अन्तर्राष्ट्रिय महिला च्याम्पियनसीप फुटबलको उपाधि जितेको छ।

घरेलु नेपाली राष्ट्रिय महिला फुटबल टिमले अर्को फाइनलमा हार ब्यहोरेको छ।

काठमाण्डौंको त्रिपुरेश्वरस्थित दशरथ रंगशालामा बुधबार सम्पन्न अन्तर्राष्ट्रिय महिला च्याम्पियनसीपको फाइनल खेलमा घरेलु नेपाल पाहूना टोली म्यान्मारसँग २–० गोल अन्तरले पराजित भएको हो।

फाइनल खेलमा खेलको ६२ औं र ६४औँ मिनेटमा गोल गर्दै म्यान्मारले २–० को नतिजा निकाल्यो।

म्यान्मारका लागि यू पीर खैंग र गीता रानामगरको आत्मघाती गोल उपहार रह्यो।

यू पीर खैंगले ६२ औं मिनेटमा गरेको गोलमा म्यान्मारले अग्रता लियो।

नेपाली डिफेन्सलाई बिट गर्दै लगेकी उनले लेफ्ट साइडबाट प्रहार गरेको बलले सिधै विपक्षी गोलपोष्ट चुम्यो।

नेपालकी गोल किपर एन्जिला सुब्बा र डिफेनडरले रोक्ने कुनै मौका नै पाएनन्।

खेलको ६४ औं मिनेटमा गीता रानामगरको आत्मघाती गोलले म्यान्मारको अग्रता दोब्बर बन्यो।

कप्तान विन थेङ्गी तुनले प्रहार गरेको बल नेपालकी मुख्य डिफेन्डर गीता रानालाई लागेर गोल हुन पुग्यो।

नेपालले लिग चरणमा म्यानमारलाई २-२ को बराबरीमा रोकेको थियो।

योसँगै नेपालले पछिल्लो १५ वर्षमा आफ्नो १३ औं फाइनलमा पनि हार ब्यहोरेको हो।

यसअघि, १२ फाइनलमा हार्दा नेपालले साफ च्याम्पियसीपको ६ वटा फाइनलमा उपविजेतामा चित्त बुझाएको छ।

त्यसैगरी, सन् २०१०, २०१६ र २०१९ को साग गेम्सको स्वर्ण पदकका लागि भएको खेलमा नेपाल भारतसँग पराजित भएको थियो।

नेपाल साफ च्याम्पियनसीपमा ६ पटक २०१०, २०१२, २०१४, २०१९, २०२२ र २०२४ मा फाइनल खेलेको थियो।

त्यस्तै, साग गेम्समा ३ पटक २०१०, २०१६ र २०१९ मा फाइनल खेलेको थियो।

यसैगरी, नादेज्दा कप २०१९ मा फाइनलमा उज्वेकिस्तानसँग पराजित भएको थियो।

हिरो वुमन्स गोल्डकपको फाइनलमा २०१९ मा म्यान्मारसँग नै पराजित भएको थियो।

यस्तै, वाफ वुमन्सको फाइनलमा २०२४ मा जोर्डनसँग पराजित भएको थियो।

यस पटकको इन्टरनेसनल वुमन्स च्याम्पियनसीपमा नेपाल घरेलु मैदानमै म्यान्मारसँग पराजित भएको छ।