यु–१९ एक दिवसीय क्रिकेट: नेपालको खराब सुरुवात

यु–१९ एक दिवसीय अन्तर्राष्ट्रिय क्रिकेट प्रतियोगितामा नेपालले खराब सुरुवात गरेको छ।

अफगानिस्तानको १९ वर्षमुनिको टोलीसँगको पहिलो युथ एकदिवसीय अन्तर्राष्ट्रिय क्रिकेट प्रतियोगितामा नेपाली युवा टोली १ सय ३० रनले पराजित भएको छ।

काठमाण्डौंको मूलपानी क्रिकेट मैदानमा अफगानिस्तानले दिएको ३ सय १ रनको लक्ष्य पछ्याएको नेपाल ४६ ओभर २ बलमा १ सय ७० रन बनाउँदै अलआउट भयो।

नेपालका निरजकुमार यादवले सर्बाधिक ५३ रन बनाए।

अफगानिस्तानका वाहिदुल्लाह जाद्रन, जाईतुल्लाह शहीन र महबूब खानले समान २/२ विकेट लिए।

यसअघि, टस जितेर ब्याटिङ गरेको अफगानिस्तानले ५० ओभरमा ९ विकेट गुमाएर ३ सय रन बनायो।

अफगानिस्तानका फैसल शिनोजादाले सर्बाधिक ९७ रन बनाए। खालिद अहमदजाईले ७६ रन जोडे।

नेपालका सन्तोष यादवले ३ विकेट लिए।

यही महिना नेपालमै हुने आइसीसी १९ वर्षमुनिको विश्वकप छनोटको तयारी स्वरूप नेपालली युवा टोलीले अफगानिस्तानको १९ वर्षमुनिको टोलीसँग ३ खेलको अभ्यास श्रृंखला खेल्न लागेको हो।

अभ्यास श्रृंखलाको दोस्रो खेल आउँदो आइतवार र तेस्रो तथा अन्तिम खेल आउँदो बुधवार हुनेछ।

यसअघि, नेपाली यु–१९ टोलीले दिल्लीको यु–१९ टोलीसँग अभ्यास श्रृंखला खेलेको थियो।

यु–१९ को विश्वकप छनोट पनि मूलपानीमै हुनेछ।