राष्ट्रपति पौडेलद्वारा पोखरास्थित सराङकोट धामको उद्घाटन

राष्ट्रपति रामचन्द्र पौडेलले पर्यटकीय नगरी पोखरास्थित सराङकोट धामको उद्घाटन गरेका छन्।

काठमाण्डौंबाट हेलीकप्टरमार्फत सिधै सराङकोट धाम पुगी राष्ट्रपति पौडेलले सराङकोट टपमा निर्माण भएका विशाल पञ्चमुखी गणेशमुर्ति, कैलाशेश्वर शिव मन्दिर, १०८ शिवलिङ्ग, जलधारा, ऐतिहासिक भूमेकालिका तथा भैरव मन्दिरसहितका धार्मिक संरचना एवं त्यहाँ जारी श्रीमद्भागवत् ज्ञानमहायज्ञ धार्मिक पर्यटन महाउत्सवको विधिपूर्वक पूजा–अर्चना गरी उद्घाटन गरे।

राष्ट्रपति पौडेलले भने, ‘त्यस अवसरमा राष्ट्रपति पौडेलले जीवनमा एक पटक पुग्नैपर्ने धामका रुपमा सराङकोटलाई चिनाउँदै त्यहाँ निर्माण भएका संरचनाको उद्घाटन गर्न पाउँदा आफूलाई पोखराको सिरान सराङकोट, महत्वपूर्ण धार्मिक पर्यटकीय गन्तव्य हो। यसले समग्र पोखरा, गण्डकी प्रदेश तथा नेपालमै पनि पर्यटन प्रवर्द्धनमा अतुलनीय योगदान दिन्छ। आँखै अगाडि देखिने हिमश्रृंखला हेर्न मात्रै होइन, सूर्योदय र सूर्यआस्त तथा पोखरालाई नजिकबाट नियाल्न पनि सराङकोट पुग्नैपर्दछ।’

राष्ट्रपति पौडेलले कृषि, जलस्रोत, पर्यटन तथा पूर्वाधार राष्ट्रनिर्माणका आधार भएको चर्चा गरे।

पोखरा महानगरपालिकाद्वारा घोषित भ्रमण वर्ष–२०२५ ले समग्र नेपालकै पर्यटन प्रवर्द्धनमा उल्लेखनीय योगदान पुग्ने उनले अपेक्षा गरे।

उनले युवा जनशक्ति पलायन मूलुकका लागि ठूलो चिन्ताको विषय भएको औंल्याए।

देशमा केही भएको छैन भन्ने भाष्य चिर्नुपर्नेमासमेत उनले जोड दिए।

संस्कृति, पर्यटन तथा नागरिक उड्डयान मन्त्री बद्रिप्रसाद पाण्डेले सराङकोट धामको एकीकृत विकासमा जोड दिए।

मन्त्री पाण्डेले नेपालको पर्यटन क्षेत्रमा निजी क्षेत्रको उल्लेख्य भूमिका रहेको स्मरण गरे।

उनले पोखरेलीले पर्यटकको आतिथ्यताका लागि आर्जन गरेको ज्ञान, सीप तथा क्षमता राज्यकै लागि अनुकरणीय रहेको सुनाए।

उक्त ज्ञान, सीप तथा क्षमतालाई देशैभर विस्तार गर्नुपर्ने उनले धारणा राखे।

असल जीवनका लागि मानिसले भौतिक विकासका अलवा आध्यात्मिक मार्गलाई पनि अनुशरण गर्नुपर्ने उनले औंल्याए।

गण्डकी प्रदेशका मुख्यमन्त्री सुरेन्द्रराज पाण्डेले नेपालको पर्यटन विकासमा गण्डकीको महत्वपूर्ण भूमिका रहेको उल्लेख गरे।

मुख्यमन्त्री पाण्डेले राष्ट्रपतिबाट सराङकोट धामको उद्घाटन हुनु प्रदेशकै लागि गौरवको विषय भएको स्पष्ट पारे।

पोखरा महानगरपालिका प्रमुख धनराज आचार्यले सराङकोटलाई पोखरा दृष्यावलोकन स्थलको संज्ञा दिए।

उनले पर्यटन राजधानी घोषणासँगै पोखरा थप लोकप्रिय बन्दै गएको चर्चासमेत गरे।

आचार्यले त्यस यता विकास साझेदार संस्थाहरुको पनि प्राथमिकतामा पोखरा पर्दै गएको अनुभव सुनाए।

त्यस अवसरमा सराङकोट धार्मिक एवं पर्यटन क्षेत्र विकास समितिका अध्यक्ष प्रेमबहादुर जिसी, पोखरा १८ का वडाध्यक्ष शिवप्रसाद तिमिल्सीनालगायतले सराङकोटको महत्वमाथि आफ्ना धारणाहरु राखे।

कार्यक्रमबीच सराङकोटको स्तरोन्नतीमा महत्वपूर्ण योगदान पु¥याउने पोखरा महानगरपालिका प्रमुख धनराज आचार्य, भागवत् भाष्कर पण्डित कमलनयन गौतम, रियल स्टेट प्रा.लिका अध्यक्ष कालु गुरुङ, सूर्यप्रेम बहुउद्देश्यीय समाज सेवा ट्रष्ट, संस्थापक अध्यक्ष स्वः लोकबहादुर थापा, इञ्जीनियरद्वय गंगासागर प्रजापति र विश्वदीप शर्मा, हिलटेक कम्पनीका कमल जैन, गुरुयोजना निर्माण संयोजक पशुपति सुवेदी तथा अन्नपूर्ण केबलकारका महाप्रवन्धक दिनेश पौडेल कदर–पत्रद्वारा सम्मानीत भए।

सराङकोटमा वि.स २०६१ सालदेखि गुरुयोजना बनाई विभिन्न संरचना निर्माण गरिएको छ।

हालसम्म विशाल शिव मन्दिर, नेपालकै पहिलो विशाल पञ्चमुखी गणेश मूर्ति, १०८ शिवलिङ्ग, १०८ धारा, भ्यू टावर, बहुउद्देश्यीय भवन, भूमे कालिका तथा भैरव मन्दिर, स्वागतद्वार निर्माण भइसकेका छन्।

ती संरचना निर्माणमा हालसम्म ३५ करोड बढी खर्च भइसकेको छ।

त्यहाँ अझै १५ करोडका संरचना निर्माण गर्ने समितिले लक्ष्य राखेको छ।

सराङकोट टपमा सडकका अलवा पोखरास्थित सेदीबाट अन्नपूर्ण केवलबारमार्फत पनि पुग्न सकिन्छ।