लमजुङको मर्स्याङदी गाउँपालिकाका किसानहरुलाई अकबरे खुर्सानी खेती तालिम 

लमजुङको मर्स्याङ्दी गाउँपालिकाका किसानहरुलाई व्यावसायिक अकबरे खुर्सानी खेती प्रविधिसम्बन्धी तालिम दिएको छ।

गाउँपालिका कृषि विकास शाखाले व्यवसायिक अकबरे खुर्सानी खेतीका लागि छनोट भएका ९ वटै वडाका किसानलाई एक दिनको तालिम प्रदान गरेको हो।

शुक्रवार संचालित तालिममा वडा नं. ५, ६, ७ र ८ का ४२ जना किसानहरु सहभागि थिए।

त्यस्तै, वडा नं. १, २, ३, ४ र ९ वडाका किसानहरुलाई विहिवार तालिम दिइएको हो।

तालिममा किसानहरुलाई अकबरे खुर्सानीको जात छनोट, जमीनको तयारी, माटो उपचार, मलखाद व्यवस्थापन, बेर्नाको उपचार, ब्याड बनाई मलचिङको व्यवस्थापन र बेर्ना रोप्ने तरिका, बेर्नाको हेरचाह, काँटछाँट, सिचाइँ, रोग किरा नियन्त्रण, टिपाई, भण्डारण, बजारीकरण, प्रशोधन, मूल्य शृंखलासम्बन्धी  हिरकुश एग्रो फार्म प्रा. लि. का अध्यक्ष गोबर्द्धन गौलीले प्रशिक्षण दिएका थिए।

वडा नं. ८ का वडा अध्यक्ष धनसिङ तामाङको अध्यक्षता एवं गाउँपालिका अध्यक्ष अर्जुन गुरुङको प्रमुख आतिथ्यतामा तालिमको आयोजना गरिएको हो।

मर्स्याङ्दी गाउँपालिकामा यसवर्ष १ सय ७५ रोपनी क्षेत्रफलमा व्यवसायिक अकबरे खुर्सानी खेती गरिदैँछ।

गाउँपालिकाले अकबरे खुर्सानी उत्पादनको संभाव्यता अध्ययन गरी व्यवसायिक अकवरे खुर्सानी कार्यक्रम अघि सारेको हो।

कार्यक्रमका लागि गाउँपालिकाले १० लाख र अन्नपूर्ण संरक्षण क्षेत्र परियोजना (एक्याप) ले १० लाख बजेट छुट्टाएको छ।

खुर्सानी खेतीका लागि पालिकाका विभिन्न स्थानमा ६ वटा नर्सरी स्थापना गरिने कृषि शाखाले जनाएको छ।

राम्रो उत्पादन र कृषकहरुको आय–आर्जनमा समेत सुधार हुने भएकाले गाउँपालिकाले अकवरे खुर्सानी व्यवसायिक खेतीलाई व्यापक बनाउने योजनासहित कार्यक्रम अघि सारेको हो।