लमजुङको मर्स्याङ्दी गाउँपालिकामा युवाहरुलाई सीप विकासका तालिम प्रदान

लमजुङको मर्स्याङ्दी गाउँपालिकामा युवाहरुलाई सीप विकासका लागि डकर्मी र प्लम्बर तालिम दिइएको छ।

मर्स्याङ्दी गाउँपालिकाले प्रधानमन्त्री रोजगार कार्यक्रम अर्न्तगत युवा रोजगारीको लागि रुपान्तरण पहल आयोजना अन्तर्गत कार्यस्थलमा आधारित सीपमुलक तालिम संचालन गरेको हो।

मर्स्याङ्दी ७ खुदीमा संचालन भएको मेसन अर्थात डकर्मी तालिममा वडा नं. ६ का ५ जना र वडा नं. ७ का १५ जना गरी २० जना युवा सहभागी छन्।

यसैगरी, प्लम्बर तालिम वडा नं ३ खुदीमा संचालन भएको छ।

उक्त तालिममा २० जनाको सहभागिता छ।

पालिकास्थित रोजगार सेवा केन्द्रमा बेरोजगार सूचीमा सूचिकृत भएको युवाहरुलाई गाउँपालिकाले ५० दिनको कार्यस्थलमा आधारित जीवनोपयोगी तथा सीप विकास तालिम संचालन गरेको हो।

प्रधानमन्त्री रोजगार कार्यक्रम अर्न्तगत यसअघि कम्तीमा पनि १ सय जना बेरोजारलाई सय दिन वरावरको रोजगार प्रदान गर्ने गरिएकोमा यसवर्ष ५० दिनको कार्यस्थलमा आधारित क्षमता तथा सीप विकास तालिम प्रदान गर्न लागिएको रोजगार सेवा केन्द्र प्रमुख नन्दराज गुरुङले बताए।

दुवै तालिममा सहभागीहरुलाई जीवन शान्ति इन्जिनियरिङ कन्सलटेन्सी ललितपुरबाट खटिएका प्रशिक्षकले प्रशिक्षण दिएका हुन्।

तालिममा ७ दिनको सैद्धान्तिक कक्षा र बाँकी प्रयोगात्मक कक्षा संचालन गरिनेछ।

मर्स्याङ्दी गाउँपालिका रोजगार सेवा केन्द्रमा यस आर्थिक वर्ष २ हजार ३ सय ३३ जना युवाहरु बेरोजगार सुचीमा सूचिकृत भएका छन्।

केन्द्रले आर्थिक वर्ष २०८२/०८३ को सय दिनको न्युनतम रोजगारीमा संलग्न हुन चाहने बेरोजगार व्यक्तिहरुलाई सूचिकृत हुन सूचित गरेको छ।

१८ देखि ५९ वर्ष उमेर समूहका बेरोजगार व्यक्तिले सम्वन्धित पालिकाको रोजगार सेवा केन्द्रमा गई सुचिकृत हुन सक्ने केन्द्रले जनाएको छ।