श्रम स्वीकृति लिएर मात्र वैदेशिक रोजगारीमा जान दूतावासको आग्रह

सरकारद्वारा तोकिएका मापदण्डबमोजिम श्रम स्वीकृति लिएर मात्र वैदेशिक रोजगारीमा जान नेपाली दूतावास बैंककले पुनःअनुरोध गरेको छ।

कम्बोडिया लाओस, म्यानमार र थाइल्याण्डलगायत मुलुकमा नेपाली नागरिक अलपत्र परेका र उद्धारका लागि कठिनाई भइरहेको दूतावासले उल्लेख गरेको छ।

दूतावासले प्रक्रियाअनुसार वैदेशिक रोजगारीमा जान पुनःआग्रह गरेको हो।

अनलाइन स्क्यामिङ कार्यमा लगाइएका नेपाली नागरिकलाई नेपाली राजदूतावासले थाइल्याण्ड सरकारको सहयोगमा म्यानमारको मेवाडीबाट उद्धार गरेको छ।

सो दूतावासले सोमबार २ नेपाली नागरिकलाई उद्धार गरेर नेपाल फिर्ता पठाएको हो।

‘अनलाइन स्क्यामिङ कार्यमा लगाइएका नेपाली नागरिकहरूलाई नेपाली राजदूतावासले थाइल्यान्ड सरकारको सहयोगमा म्यानमारको मेवाडीबाट उद्धार गरी टास्क इमिग्रेसन अफिस मेसोट हुँदै थाइल्यान्ड ल्याई दुई नेपालीलाई आज (फागुन १२ गते) नेपाल फर्काइएको छ’, बैंककस्थित नेपाली दूतावासले सोमबार जारी गरेको विज्ञप्तिमा उल्लेख गरेको छ।

यसअघि, दूतावासले गएको शुक्रवार मेवाडीबाट ५ जना नेपालीको उद्धार गरेको थियो।

दूतावासले कसैको प्रलोभनमा परी छिटो, धेरै पैसा कमाउने हेतु वैदेशिक रोजगारीमा नआउनका लागि सम्बन्धित सबैमा पुनःअनुरोध गरेको छ।