संचारकर्मी र संचारगृहमाथिको आक्रमणबारे छानविन समिति गठन

नेपाल पत्रकार महासंघले काठमाण्डौंको तीनकुनेमा शुक्रबार भएको प्रदर्शनमा संचारकर्मीको मृत्यु र संचारगृहमाथि भएको आक्रमणको अध्ययन गर्न ७ सदस्यीय समिति गठन गरेको छ।

महासंघको आज (शनिबार) राजधानीमा बसेको उपलब्ध पदाधिकारी र केन्द्रीय सदस्यको बैठकले उपाध्यक्ष उमीद बागचन्दको संयोजकत्वमा ७ सदस्यीय समिति गठन गरेको हो।

समितिमा महासंघका ६ जना सचिव सदस्य रहेका छन्।

समितिमा सचिवहरु रमेश खतिवडा, प्रकाश धौलाकोटी, सोनी शर्मा, अशोक तिवारी, वैकुण्ठ पराजुली र सविन प्रियासन सदस्य रहेको महासंघले जनाएको छ।

समितिले आज (आइतबार) नै आक्रमण गरिएका संचारगृहमा गएर अध्ययन गर्न लागेको संयोजक बागचन्दले जानकारी दिएका छन्।

समितिले घटनाका पीडित, प्रत्यक्षदर्शी र पीडितका परिवारसँग छलफल गर्नेछ।

समितिले घटना के, कसरी भयो ? अब महासंघ कसरी अघि बढ्ने ? लगायतका विषयमा सुझावसहितको प्रतिवेदन दिने जनाइएको छ।

पूर्वराजा समर्थित समूहहरुले शुक्रबार राजधानी काठमाण्डौंको तीनकुने क्षेत्रमा आगलागी, तोडफोडलगायत अराजक गतिविधिमा उत्रेका थिए।

प्रदर्शनकारीका कारण एभिन्युज टेलिभिजनका पत्रकार सुरेश रजकको निधन भएको थियो।

कान्तिपुर टेलिभिजन र अन्नपूर्ण पोष्ट दैनिकको कार्यालयमा पनि प्रदर्शनकारीले आक्रमण एवं तोडफोड गरेका थिए।