स्याङ्जाको भीरकोट–८ मा जन्मने नवजात शिशुको खातामा ५ हजार जम्मा

स्याङ्जाको भीरकोट नगरपालिका वडा नं ८ मा जन्मने नवजात शिशुको खातामा ५ हजार जम्मा गरिदिने अभियान थालेको छ।

जन्मदर्ता प्रोत्साहन गर्न सो नगरपालिकाको वडा नं ८ ले बच्चा जन्मेपछि खाता खोलेर जवजात शिशुको खातामा ५ हजार जम्मा गरिदिने अभियान थालेको हो।

वडा कार्यालयले चालु आर्थिक वर्षदेखि यो अभियान थालेको हो।

बच्चा जन्मेपछि ८ नं वडा कार्यालयमा जन्मदर्ता गर्ने सबै नवजात शिशुहरूका लागि लागू हुने गरी वडा कार्यालयले ५ हजार र अभिभावकले ५ हजार गरी कुल १० हजार खातामा जम्मा गरिदिने वडा अध्यक्ष नन्दलाल खनालले बताए।

शिशुको खातामा जम्मा भएको रकम बच्चाको उमेर १८ वर्ष पूरा भएपछि मात्र अभिभावकले परिवारले निकाल्न पाउने व्यवस्था गरिएको वडाध्यक्ष खनालको भनाई छ।

चालु आर्थिक वर्षको साउनदेखि हालसम्म वडा कार्यालयमा ३१ जना बालबालिकाको जन्मदर्ता भएको छ।

खाता खोल्ने अभियान सँगसँगै वडा कार्यालयले भालेसहित सुत्केरी भेटघाट, न्यानो भोटो वितरणजस्तालाई निरन्तरता दिएको छ।

उनले भने, ‘सुनौला हजार दिनका आमा र शिशुको स्वास्थ्य तथा पोषणमा ध्यान दिँदै वडाका जनप्रतिनिधि तथा स्वास्थ्यकर्मीहरू घर–घरमा पुग्छौँ। स्वास्थ्यसम्बन्धी परामर्श पनि दिने गरेका छौँ।’