‘स्वास्थ्य क्षेत्रलाई पहिलो प्रथामिकतामा राखी काम गरिरहेका छौँ’

गण्डकी प्रदेशका मुख्यमन्त्री सुरेन्द्रराज पाण्डेले सरकारले नागरिकलाई घर–आँगनबाट स्तरीय स्वास्थ्य सेवा दिनेगरी काम गरिरहेको बताएका छन्।

बागलुङको ढोरपाटन नगरपालिका–१ बुर्तिबाङमा आज (शुक्रबार) आयोजित प्रदेशस्तरीय अस्पतालको उद्घाटन कार्यक्रममा उनले भने, ‘अब कोही पनि नागरिकले उपचार नपाएर अकालमा ज्यान गुमाउनु पर्दैन।’

नागरिकको आवश्यकता बढी हुनुका साथै सीमित स्रोत र साधनको परिचालन गरेर काम गर्दा सबैतिर एकै पटक विकास हुन नसकेको मुख्यमन्त्री पाण्डेको प्रतिक्रिया छ।

जनताका स्वास्थ्यसम्बन्धी आवश्यकतालाई पहिलो प्रथामिकतामा राखेर प्रदेश सरकारले काम गरिरहेको उनले दाबी गरे।

मुख्यमन्त्री पाण्डेले भने, ‘हामीसँग स्रोत सीमित छ। जनताको आवश्यकता बढी छन्। यद्यपि, प्रदेश सरकारले सबै क्षेत्रमा क्रमिक रूपमा काम गरिरहेको छ। नागरिक स्वस्थ रहनुपर्छ भन्ने मान्यताअनुसार स्वास्थ्यलाई प्राथमिकतामा राखेर काम भइरहेको छ। म मुख्यमन्त्री भएर आउँदा ५ सय जना डायलायसिस गर्नुपर्ने बिरामी लाइनमा हुन्थ्यो। अहिले, त्यो अवस्था शून्यमा झरेको छ।’

मुख्यमन्त्री पाण्डेले अहिले राज्यको चुनौतीका रूपमा बसाइँसराइँ रहेको औंल्याए।

‘त्यसलाई रोक्नका लागि प्रदेश सरकार लागिरहेको छ। गाउँमा गुणस्तरीय स्वास्थ्य, शिक्षा, रोजगार र अन्य विकासका काम योजनाबद्ध रूपमा गरिरहेको छ’, मुख्यमन्त्री पाण्डेले दाबी गरे।

सबै युवालाई आफ्नै ठाउँमा बस्ने वातावरण बनाउने उद्देश्यसहित स्वरोजगारमूलक सीप विकास गर्ने योजनामा प्रदेश सरकार रहेको मुख्यमन्त्री पाण्डेले उल्लेख गरे।

उनको भनाई छ, ‘पछिल्लो समय विकास नै भएन भन्ने गलत भाष्य निर्माण भएको छ। २०४८ सालयता मुलुकमा पूर्वाधार विकाससहित स्वास्थ्य, शिक्षा, रोजगारलगायतका क्षेत्रमा परिवर्तन आएको छ।’