हरित रोजगारी सिर्जना परियोजनाअन्तरगतको पोखरामा ‘कोसेली घर’

पोखरामा ‘कोसेली घर’ संचालन आउँदैछ।
कोरिया अन्तर्राष्ट्रिय सहयोग नियोग (कोइका) र संयुक्त राष्ट्रसंघीय विकास कार्यक्रम (युएनडीपी) को आर्थिक सहयोगमा रिसाइक्लिङ र अपसाइक्लिङमार्फत हरित रोजगारी सिर्जना परियोजनाअन्तरगत ‘कोसेली घर’को शिलान्यास गरिएको छ।

‘कोसेली घर’को पोखरा महानगरपालिकाका प्रमुख धनराज आचार्य, उपप्रमुख मन्जुदेवी गुरुङ, कोइका नेपालका कन्ट्री डाइरेक्टर मोहेन कोङ, युएनडीपीका एसिया क्षेत्रीय निर्देशक क्रिस्टोफर बहुयेटले संयुक्त रूपमा पोखरा नयाँबजारस्थित प्रदर्शनी केन्द्रमा शिलान्यास गरेका हुन्।

नगर प्रमुख आचार्यले कार्यक्रममा बोल्दै हरित रोजगारी सृजनासँगै चकृय अर्थतन्त्रको निर्माणमा यसले महत्वपूर्ण योगदान गर्ने विश्वास व्यक्त गरे।

फोहोरमैलाको व्यवस्थापन निकै चुनौतीपूर्ण भइरहेका बेला यसलाई मोहोरमा बदल्ने गरी महानगर क्षेत्रका १३६ वटा समूहहरू मार्फत पुन: प्रयोगमा आउने सामाग्रीहरू निर्माण गरी आर्थिक रूपमा सामुदायिक सशक्तिकरणसमेत हुने आचार्यको विश्वास छ।

आचार्यले भने, ‘विभिन्न चरणमा हामीले पोखरा महानगरपालिकाका १३६ वटा सामुदायिक समूहहरू निर्माण गरी आवश्यक तालिम तथा प्राविधिक दक्षता अभिवृद्धिको कार्यक्रम गरीसकेका छौँ। यसले सामुदायिक स्तरमा रोजगारी सृजना र चकृय आर्थिक प्रणालीमा जोडिने अवसरसमेत प्रदान गर्नेछ।’

विदेश पलायन भइरहेको युवाशक्ति र गृहिणी महिलाहरूका लागि समेत हरित रोजगारी सृजना महत्वपूर्ण रहेको उनले बताए।

‘यस परियोजनाले युवाहरूलाई रोजगारीसँग जोड्नेछ भने, फोहोरबाट मोहोर पनि आर्जन हुनेछ’, नगर प्रमुख आचार्य भने।

परियोजनाको पहिलो चरणमा ३ हजार बढीका लागि प्रत्यक्ष/अप्रत्यक्ष रोजगारी सृजना हुने उनले बताए।

कोइका नेपालका कन्ट्री डाइरेक्टर मोहेन कोङले पोखरा महानगरपालिका र कोइकाबीचको सहकार्य तथा समझदारीलाई बलियो बनाउँदै यस परियोजनाले नयाँ उचाई प्रदान गर्ने विश्वास व्यक्त गरे।

नेपालको पर्यटन राजधानी पोखरामा रिसाइकल र अपसाइकलमार्फत हरित रोजगारी सृजनाको नमुनाका रूपमा विकास गर्न यो परियोजना कोषेढुंगा साबित हुने कोङ्ले उल्लेख गरे।

ग्रीन जब क्रियसन संसारमा निकै प्रभावकारी परियोजनाका रूपमा अगाडी आएको उनले बताए।

संयुक्त राष्ट्रिय विकास कार्यक्रम (युएनडीपी) का एसिया क्षेत्रीय निर्देशक क्रिस्टोफर बहुयेटले हरित अर्थतन्त्रमा योगदान पुर्‍याउने दिगो रिसाइकल र अप–साइकल (आरयु) उद्यमहरूलाई बढावा दिन यो परियोजना प्रभावकारी हुने उल्लेख गरे।

उनका अनुसार यसले आरयु उद्यमहरूको क्षमता निर्माण गरी हरित रोजगारी सिर्जना गर्न सहयोग गर्नेछ।

परियोजनामार्फत ग्रीन भेन्चर जोन (जीभीजेड) स्थापना गरी नयाँ तथा आरयु उद्यमहरूलाई व्यवसाय इन्क्युबेशन सहायता (वित्तीय, प्राविधिक र बजार) प्रदान गरिने उनले उल्लेख गरे।

पोखरा महानगरपालिकाकी उपप्रमुख मन्जुदेवी गुरुङले स्वच्छ पोखरा, हरित पोखरा निर्माणसँगै हरित रोजगारी सृजनामा समेत यो परियोजनाले उल्लेखनीय भूमिका खेल्ने विश्वास व्यक्त गरिन्।

कास्कीका प्रमुख जिल्ला अधिकारी भरतमणि पाण्डेले पर्यटन राजधानी पोखराका लागि परियोजना रोजगारी सृजनाको नयाँ प्रयोगका रूपमा प्रभावकारी हुने स्पष्ट पारे।

पोखरा उद्योग वाणिज्य संघका अध्यक्ष गोकर्ण कार्कीले यो परियोजना पोखराका लागि रोजगारी सृजना, सिकाई प्रवद्र्धन र उत्पादनका हिसाबले महत्वपूर्ण हुने बताए।

परियोजनामा कोइकाले ९.८ मिलियन अमेरिकी डलर र युएनडीपीले ०.८७ मिलियन अमेरिकी डलर लगानी गर्नेछन्।

१ वर्ष ६ महिनामा निर्माण सम्पन्न गर्नेगरी ‘कोसेली घर’ निर्माणको ठेक्का इन्टरनेश्नल इञ्जीनियरिङ एन्ड कन्स्ट्रक्सन कम्पनी अनामनगर काठमाण्डौले पाएको छ।

परियोजनाले नकुहिने फोहोर प्रशोधनसहित फोहोरबाट नयाँ चिजहरू उत्पादन गर्नेछ।

यसलाई सिकाई केन्द्रका रूपमा विकास गरिने र पोखराका लागि एक पर्यटन गन्तव्यका रूपमा समेत यो स्थापित हुने विश्वास गरिएको छ।

फोहोरमैलाको उचित व्यवस्थापनमार्फत हरित रोजगारी सृजना र चकृय अर्थतन्त्रको सृजनशील उपयोग आम समुदायका लागि निकै महत्वपूर्ण मानिन्छ।

हरित अर्थतन्त्रमा योगदान पुर्‍याउने आरयु उद्यमहरूलाई बढावा दिन दिगो नीतिको सुनिश्चिततासहित महानगरपालिकाले परियोजनाको स्वामित्वमा लिनेछ।

३० अगस्ट २०२३ मा नगर प्रमुख आचार्य र कोइकाका उपप्रमुख युन यंग लीबीच सम्झौता भएको थियो।