१४ औं संस्करणको एन प्याब्सन खेलकुद महोत्सव मंसीर २५ बाट

विगतमा जस्तै यस वर्षपनि एन प्याब्सन कास्कीले खेलकुद महोत्सवको आयोजना गर्दैछ।

यही मंसीरको २५ गतेदेखि राष्ट्रिय निजी तथा आवासीय विद्यालय एशोसिएसन नेपाल (एन प्याब्सन) कास्कीले १४ औं संस्करणको महोत्सव गर्न लागेको शनिबार पोखरामा आयोजित पत्रकार सम्मेलनमा जानकारी गराएको छ।

खेल महोत्सवमा कक्षा १ देखि ७ कक्षासम्मको छात्र/छात्रा जुनियरतर्फका विद्यार्थीहरुले १०० मिटर, २०० मिटर, ४०० मिटर, १०० हर्डल्स ४ मिटर, लङजम्प, हाइजम्प, ह्याण्डबल, ब्याडमिन्टन (सिंगल), र टेबलटेनिस (सिंगल) लगायतका खेलहरुमा प्रतिस्पर्धा गर्नेछन्।

त्यसैगरी, कक्षा १ देखि १० कक्षासम्मका छात्र/छात्रातर्फका सिनियर विद्यार्थीहरुले १०० मिटर, २०० मिटर, ४०० मिटर, ८०० मिटर, १५०० मिटर, १०० हर्डल्स ४ मिटर, लङजम्प, हाइजम्प, भलिबल, फुटबल, ब्याडमिन्टन (डबल्स), टेबल टेनिस (डबल्स), बास्केटबल, क्रिकेट र ५ किलोमिटरको दौडमा प्रतिस्पर्धा गर्नेछन्।

छात्रतर्फको फुटबल ११ ए साइड र छात्रातर्फ भने सेभेन ए साइड फुटबलमा विद्यार्थी खेलाडीहरुले प्रतिस्पर्धा गर्नेछन्।

कक्षा ११ र १२ का छात्रतर्फका विद्यार्थीहरुले मात्र फुटसलमा प्रतिस्पर्धा गर्नेछन्।

त्यसैगरी, कक्षा ११ र १२ कै छात्र÷छात्रा दुबैतर्फका विद्यार्थीहरुले बास्केटबल खेलमा प्रतिस्पर्धा गर्नेछन्।

पोखरा रंगशालामा हुने खेलकुद महोत्सवमा ४६ विद्यालयका झण्डै ८ हजार ५ सय विद्यार्थी खेलाडीहरुले प्रतिस्पर्धा गर्नेछन्।

छात्र जुनियरतर्फ ११ सय ५० र सिनियरतर्फ ३२ सय तथा जुनियर छात्रातर्फ ११ सय ५० र सिनियरतर्फ २६ सय खेलाडीहरुले प्रतिस्पर्धा गर्नेछन्।

कक्षा ११ र १२ अन्तर्गतको खेल इभेन्टमा छात्रतर्फ २५० र छात्रातर्फ १५० विद्यार्थी खेलाडीहरुले प्रतिस्पर्धा गर्नेछन्।

यस संस्करणको खेलकुद महोत्सवमा कूल ९२९ जना विद्यार्थी खेलाडीहरुलाई पुरस्कार प्रदान गरिने एन प्याब्सन कास्कीका अध्यक्ष हेमन्त अधिकारीले बताएका छन्।

जसमध्ये, २५१ स्वर्ण, २५१ रजत र ४२७ कास्य पदक वितरण गरिनेछ।

अधिकारीका अनुसार, मंसीरको २२ गते बिहान साढे ७ बजे छात्र/छात्रा दुबैतर्फको ५ किलोमिटर दौड आयोजना गरी अनौपचारिक रुपमा यस संस्करणको खेलकुद महोत्सव सुरु हुनेछ।

मंसीरको २५ गते नेपाल सरकार खेलकुदमन्त्री तेजुलाल यादवले खेलकुद महोत्सवको औपचारिक उद्घाटन गर्ने कार्यक्रम छ।

मंसीरको २८ गतेसम्म खेलकुद महोत्सव चल्नेछ।