३ वर्षमा १६ सय ६६ अनलाइन सूचीकृत

पछिल्लो ३ वर्षमा प्रेस काउन्सिल नेपालमा १ हजार ६ सय ६६ अनलाइन संचार माध्यम सूचीकृत भएका छन्।

नयाँ खुलेका अनलाइनका सम्पादक र संचालकहरुलाई पत्रकार आचारसंहिताको अभिमुखिकरण दिने क्रममा सोमबार काउन्सिलले उक्त विवरण सार्वजनिक गरेको हो।

सो अभिमुखीकरण कार्यक्रमलाई सम्बोधन गर्दै काउन्सिलका अध्यक्ष बालकृष्ण बस्नेतले विभिन्न पृष्ठभूमीबाट संचार क्षेत्रमा प्रवेश गर्नेहरुलाई पत्रकार आचारसंहिताको दृष्टिकोणबाट लिइने यस्ता कक्षा उपयोगी हुने बताए।

‘स्वच्छ, मर्यादित, तथ्यपूर्ण र विवादरहित पत्रकारिताका लागि हरेक संचारकर्मीले पत्रकार आचारसंहिताको पूर्ण पालना गर्नुपर्छ’, उनले भने।

प्रेसले पाएको स्वतन्त्रताको अर्थ जथाभावी अधिकार वा स्वच्छन्दता नभएको प्रसंग ल्याउँदै बस्नेतले युट्युबसहित सामाजिक सञ्जाल प्रयोग गर्ने सबै संचार माध्यम जिम्मेवार हुनुपर्नेमा जोड दिए।

‘प्रेस तथा अभिव्यक्ति स्वतन्त्रतालाई बलियो बनाउन संचारकर्मी स्वंयको हात महत्वपूर्ण हुन्छ। अपूर्ण, मिथ्या, कमजोर र असन्तुलित सूचना संप्रेषणले प्रेस जगतलाई नै कमजोर बनाउँछ। यसतर्फ काउन्सिल सचेत भई जिम्मेवारपूर्ण ढंगले काम गर्दै आएको छ। अभिमुखिकरण कक्षा यसैको एउटा श्रृंखला हो’, अध्यक्ष बस्नेतले भने।

कार्यक्रममा अग्रज पत्रकार एवं गोरखापत्र दैनिकका निमित्त प्रधानसम्पादक शिवकुमार भट्टराई र काउन्सिलका मुख्य अधिकृत झविन्द्र भुसालले विषयवस्तुमाथि सहजीकरण गरेका थिए।

पर्याप्त मेहनतसहित निष्पक्ष ढंगले गरिने पत्रकारिताले नै विश्वसनीयता बढाउने अग्रज पत्रकार भट्टराईको सुझाव थियो।

उनले पत्रकार तथा संचार माध्यमले गर्न नहुने विभिन्न कामको बारेमा प्रकाश पारेका थिए।

भुसालले काउन्सिलले विभिन्न समयमा जारी गरेका संचार निर्देशिकाहरुमा केन्द्रीत रहेर अन्तरक्रिया गरेका थिए।

२०७८ चैतदेखि नियमित रुपमा अभिमुखिकरण कक्षा संचालन हुँदै आएको काउन्सिलका शाखा अधिकृत सुवास राईले जानकारी दिए।

अनलाइन संचार माध्यम संचालन हुनुअघि संचालक र सम्पादकलाई अनिवार्य रुपमा अभिमुखिकरणमा सहभागी हुनुपर्ने व्यवस्था काउन्सिलले गरेको छ।

पत्रकार आचारसंहिता उल्लंघन गर्ने पत्रकारलाई पनि काउन्सिलले यस्तो कक्षामा सहभागी गराउँदै आएको छ।