४६ जना पत्रकारको नि:शुल्क दुर्घटना बीमा

सूचना तथा प्रसारण विभागले यस वर्ष ४६ जना पत्रकारको नि:शुल्क दुर्घटना बीमा गराइदिएको छ।

पत्रकारहरूको दुर्घटना बीमा गराउने सरकारको कार्यक्रमअनुसार सूचना तथा प्रसारण विभागले यस वर्ष ४६ जना पत्रकारको ७ लाख रुपैयाँ बराबरको दुर्घटना बीमा गराएको हो ।

विभागकी निर्देशक पूर्णिमा उपाध्यायको अध्यक्षतामा आइतबार पत्रकार दुर्घटना बीमा छानबिन तथा मूल्यांकन समितिको बैठक बसेर बिमाका लागि आवेदन दिएका ४६ जना पत्रकारको दुर्घटना बीमा गराउने निर्णय भएको विभागले जनाएको छ।

निर्देशक उपाध्यायका अनुसार विभागले २ पटक आवेदन माग गर्दा ४७ जनाले आवेदन दिएको र रित पुगेका ४६ जनाको दुर्घटना बीमा गरिएको जानकारी दिइन्।

यो बीमा १ वर्षका लागि लागु हुनेछ।

विभागले कार्तिक तेस्रो साता पहिलो र माघ अन्तिममा दोस्रो पटक सूचना प्रकाशन गरेर पत्रकारहरूलाई आवेदन दिन आव्हान गरेको थियो।

पहिलोपटक ३७ जनाले मात्रै आवेदन दिएपछि दोस्रो पटक पुन: माग गर्दा ९ जनाले आवेदन दिएका थिए।

पत्रकारहरूको दुर्घटना बीमा गराउने सरकारी कार्यक्रमअनुसार विभागले वर्षेनी सूचना प्रकाशित गरेर आवेदन संकलन गरी बीमा गराई रहेपनि पत्रकारहरूको सहभागिता कम हुँदै गएको छ।