४ देशीय अन्तर्राष्ट्रिय महिला फुटबलमा नेपाल–म्यानमारले बराबरी खेल्यो

४ देशीय अन्तर्राष्ट्रिय महिला च्याम्पियनसीप फुटबलमा नेपाल र म्यानमारले बराबरी खेलेको छ।

यसअघि नै फाइनल पुगेको दुबै टोलीले २–२ गोलको बराबरी खेलको हो।

म्यानमारका लागि मे हटेट लूले दुबै गोल गरेकी हुन्।

नेपालका लागि सबिता रानामागर र साबित्रा भण्डारी ‘साम्बा’ ले गोल गरे।

काठमाण्डौंको त्रिपुरेश्वरस्थित दशरथ रंगशालामा भइरहेको खेलमा मे हटेटको गोलमा म्यानमारले खेलको छैटौं मिनेटमै अग्रता लियो।

तर, खेलको ११ औं मिनेटमा सबिता रानामगरले गोल गर्दै खेल बराबरीमा ल्याइन्।

फेरि १७ औं मिनेटमा मे हटेटकै दोस्रो गोलमा म्यानमारले अग्रता लियो।

तर, खेलको ४१ औं मिनेटमा सावित्रा भण्डारी ‘साम्बा’ ले गोल गर्दै खेल २–२ को बराबरीमा ल्याइन्।

नेपाल र म्यानमार दुवै टोली फाइनलमा पुगिसकेका छन्।

यो खेलले लिग चरणको विजेता र उपविजेताको टुंगो लगाएको छ।

यस खेलबाट म्यानमार विजेता र नेपाल उपविजेता बनेर आउँदो बुधबार उपाधिका लागि फाइनल खेल्नेछ।

राउन्ड रोविन लिगका आधारमा खेलाइएको च्याम्पियनसीप फुटबलमा दुबै टोली अपराजित छन्।

तर, गोल संख्याका आधारमा म्यानमार विजेता र घरेलु नेपाल उपविजेता बनेको हो।

प्रतियोगितामा आज भएको पहिलो खेलमा कीर्गिस्तानलाई २–० गोलले हराउँदै लेबनानले सान्त्वना जीत हात पारेको छ।

कीर्गिस्तान ३ वटै खेलमा पराजित भयो।

दुवै टोली लिग चरणबाट बाहिरिइसकेका छन्।

नेपाल र म्यानमारबीच अहिलेसम्म ४ पटक भेट भएको छ।

जसमा नेपाल ३ खेलमा पराजित हुँदा १ खेल बराबरीमा रोकिएको छ।