४ देशीय महिला क्रिकेटः तेस्रो खेलमा नेपाल हङकङसँग हार्‍यो

४ देशीय महिला वुमन्स डे कप टी–२० अन्तर्राष्ट्रिय क्रिकेट श्रृंखलामा नेपाल हङकङसँग पराजित भएको छ।

हङकङसँगको खेलमा नेपाल २ रनले पराजित भएको हो।

युगान्डाको एन्टेबे क्रिकेट ओभलमा सोमबार भएको नेपालको तेस्रो खेलमा जीतका लागि हङकङले दिएको १०१ रनको लक्ष्य पछ्याएको नेपालले निर्धारित ओभरमा ७ विकेट गुमाएर ९८ रनमात्र बनाउन सक्यो।

नेपालका लागि कप्तान इन्दु बर्माले सर्वाधिक ३२ रन बनाइन्।

पूजा महतोले १९ रन जोडिन्। बिन्दु रावलले १४ रन थपिन्।

हङकङकी मारिको हिलले २ विकेट लिइन्।

त्यसअघि, टस हारेर पहिले ब्याटिङ गरेको हङकङले ७ विकेटको क्षतिमा १०० रन बनाएको थियो।

हङकङका लागि कप्तान नताशा माइल्सले सर्वाधिक ३५ रन बनाइन्।

मारिको हिलले २१ रन थपिन्।

क्यारी चानले १२ रन जोडिन्।

नेपालकी इन्दु बर्मा र इश्वरी विष्टले समान २/२ विकेट लिए।

पूजा महतो र रचनाकुमारी चौधरीले समान १/१ विकेट लिए।

पहिलो खेलमा नामिबियासँग पराजित भएको नेपालले दोस्रो खेलमा युगाण्डालाई पराजित गरेको थियो।

४ देश सम्मिलित प्रतियोगिताको लिग चरणमा प्रत्येक टिमले अर्को टिमसँग २/२ पटक खेल्नुपर्नेछ।

प्रतियोगिताको शीर्ष स्थानमा रहने २ टोली उपाधिका लागि खेल्नेछन्।

फाइनल खेल चैत ३ गते हुनेछ ।