असार २२ मा नेपाल पत्रकार महासंघको चुनाव

आगामी असार २२ गते नेपाल पत्रकार महासंघको चुनाव हुने भएको छ।

महासंघले सो मितिमा मतदान गर्नेगरी महाधिवेशनको निर्वाचन कार्यतालिका सार्वजनिक गरेको छ।

महासंघको केन्द्रीय निर्वाचन समितिले आज (शुक्रबार) निर्वाचन कार्यतालिका प्रकाशन गरेको हो।

निर्वाचन कार्यतालिकाअनुसार यही असार २२ गते बिहान ९ बजेदेखि साँझ ५ बजेसम्म मतदानका लागि समय तोकेको छ।

महासंघले असारको ७ गते साँझ साँढे ८ बजे मतदाताहरुको प्रारम्भिक नामावली समेत प्रकाशन गरेको छ।

सोही समयदेखि असारको १० गते विहान १० बजेसम्म मतदाता उपर दावा विरोध गर्ने समय तोकेको छ।

असार १२ गते अन्तिम मतदाता नामावली प्रकाशन गरिने निर्वाचन समितिले जनाएको छ।

उम्मेदवारको मनोनयन दर्ता असार १३ गते र उम्मेदवारको नामावली प्रकाशन पनि सोही दिन गरिने छ।

उम्मेदवारको अन्तिम नामावली असार १५ गते प्रकाशन गरिनेछ।

यस्तै, असार १३ गते उम्मेदवारउपर दावी विरोध गर्ने मिति जनाइएको छ। उम्मेदवारको नामावली उपरको दाबी विरोध असार १३ गतेदेखि असार १५ गतेसम्म तोकिएको छ।

असार १० गतेसम्म मतदाता नामावली उपर दावी विरोधको समय निर्धारण गरिएको छ।