पोखराको कालिकास्थान–पुँडिटार–लामेआहाल सडकको शिलान्यास

पोखराको कालिकास्थान–पुँडिटार–लामेआहाल सडकको शिलान्यास गरिएको छ।

विश्व बैंकको आर्थिक सहयोगमा निर्माण हुने तेस्रो परियोजना दोविल्ला–बाधमारा–तिक्लाङ्–बडहरकोट–लामगाडी–चापलाङ–उपल्लो पुडिँटार–तल्लो–पुँडीटार–झिगटे(जनजागृती मावि) तगारेगौडा–तल्लो गगनगौडाँ सडक अन्तरगत कालिकास्थान–पुँडीटार–लामेआहाल सडकको शिलान्यास गरिएको हो।

पोखरा महानगरपालिकाका प्रमुख धनराज आचार्य, सहरी विकास मन्त्रालयका सचिव मणिराम गेलाल र विकास साझेदार विश्व बैंकका एनइयुजीआइपी परियोजना हेर्ने टास्क टिम लिडर आवेवाओले संयुक्त रूपमा सडकको शिलान्यास गरेका हुन्।

सडकको शिलान्यास गर्दै नगरप्रमुख आचार्यले स्थानीय अवरोधका कारण बाटो नबन्ने अवस्थाको सृजना हुन नदिने प्रतिबद्धता जनाए।

‘बाटो स्थानीय उपभोक्ताका लागि त हो नै, यो बाटो पोखरा जोड्ने अर्को लाइफ लाइन पनि भएकाले यसको निर्माणका क्रममा आउन सक्ने कुनैपनि प्रकारका स्थानीय अवरोधहरू तत्काल समाधान गरिनेछन्’, आचार्यले भने, ‘यसको समय पनि छोटो छ, स्थानीयहरूले यसका आवश्यक सहजिकरण गरिदिनुहुनेछ।’

महानगर प्रमुख आचार्यले उक्त क्षेत्रको सहरी पूर्वाधार निर्माण गर्दै जनजीवनलाई विकाससँग जोड्ने कुरामा महानगरपालिका प्रतिबद्ध रहेको बताए।

सहरी विकास मन्त्रालयका सचिव गेलालले सडक निर्माण कार्य तोकिएकै समयमा सम्पन्न हुने विश्वास व्यक्त गरे।

यो पोखरा महानगरपालिकाको परियोजना भएकाले दायित्व पनि महानगर कै हुने र आवश्यक परेका बखत मन्त्रालयले आवश्यक सहजिकरण गरिदिने उनले बताए।

पोखरा महानगरपालिकाका प्रमुख प्रशासकीय अधिकृत श्यामकृष्ण थापाले सडकको गुणस्तरीय निर्माणमा जोड दिए।

विश्व बैंकका टास्क टिम लिडर आवेवाओले समय छोटो समय भएकाले तीव्र गतिमा काम अघि बढाउन अनुरोध गरे।

पोखरा महानगरपालिका वडा नं.३३ का वडा अध्यक्ष रामचन्द्र अधिकारीले वडामा निर्माण हुन लागेको सडक निर्माण कार्यको निरन्तर निगरानी गरी आवश्यक सहजिकरण गर्ने प्रतिबद्धता जनाए।

सडकको निर्माण कम्पनी आसिस निर्माण सेवा प्रा.लि. भरतपुरसँग सम्झौता भएको छ।

३९० दिनमा निर्माण सम्पन्न गर्ने गरी सम्झौता भएको हो।

विश्व बैंकको ७७ करोड ६८ लाख ९२ हजार ८३७ रुपैयाँ लागत सहयोगमा निर्माण हुने सडकको सेक्सन १ र २ गरी २ वटा खण्डमा काम हुनेछ।

सडकको पहिलो सेक्सनमा वडा नं.३३ को कार्यालयदेखि उपल्लो पुँडीटारसम्म ९.६२७ कि.मी. र दोस्रो सेक्सनमा पहिलो सेक्सनको जक्सनदेखि तल्लो गगनगौडाँ (पृथ्वीराज मार्ग) सम्म २.८१३ कि.मी. सडक निर्माण हुनेछ।

परियोजना अन्तरगत करीब १२.४४ कि.मी. सुविधासम्पन्न सडक निर्माण हुनेछ।

७ मिटर चौडाईको सडक अस्फाल्ट पिच हुनेछ।

सडकको दायाँबायाँ ड्रेनसहितको २÷२ मिटरको फुट ट्याक हुनेछ।

सम्झौतापछि परियोजनाको जोइन्ट सर्वेको काम सुरु भइसकेको छ।

३ अरब रुपैयाँ आर्थिक सहायतामध्ये तालचोक बेगनास सडकको लगानीबाट बचेको रकम परिचालनका सम्बन्धमा विश्व बैंकले परियोजना प्रस्ताव गर्न आग्रह गरेबमोजिम नगर प्रमुख आचार्यले उक्त सडक स्तरोन्नतिलाई प्राथमिकतामा राखेका थिए।

विश्व बैंककै सहयोगमा शिशुवा–शिशाघाट सडकको समेत काम थालिएको छ।