नेपाल काभा महिला भलिबल लिगको फाइनलमा

इरानलाई हराउँदै नेपाल काभा महिला भलिबल लिगको फाइनलमा पुगेको छ।

काठमाण्डौको त्रिपुरेश्वरमा रहेको राष्ट्रिय खेलकुद परिषद् (राखेप) को कभर्डहलमा आज भएको दोस्रो सेमिफाइनलमा नेपालले इरानलाई ३–० को सोझो सेटमा हरायो।

नेपालले पहिलो सेट २५–२१, दोस्रो सेट २८–२६ र तेस्रो सेट २५–२० ले जित्यो।

योसँगै नेपालले लिग चरणमा इरानसँगको हारको बदला लिएको छ।

लिग चरणमा नेपाल इरानसँग ३–२ को सेटमा पराजित भएको थियो।

अब, नेपालले उपाधिका लागि भोलि (बुधबार) भारतसँग खेल्नेछ।

आज भएको पहिलो सेमिफाइनलमा श्रीलंकालाई ३–० को सोझो सेटमै हराउँदै भारत फाइनलमा पुगेको छ।

काभा महिला भलिबल प्रतियोगितामा ५ देश सहभागी छन्।

प्रतियोगितामा सहभागी माल्दिभ्स १ अंक पनि नजोडी लिगबाटै बाहिरिएको थियो।