२३ औ आहा ! रारा गोल्ड कपमा करिब १६ लाख घाटा

सहारा क्लब पोखराले गत माघमा आयोजना गरेको २३ औँ संस्करणको आहा ! रारा गोल्ड कप फुटबल प्रतियोगिता घाटामा गएको छ।

क्लबले पत्रकार सम्मेलन गरेर प्रतियोगिता आयोजना गर्दा १५ लाख ३८ हजार रुपैयाँ घाटा भएको क्लबका अध्यक्ष केशवराज बरालले जानकारी दिएका छन्।

उनले आर्थिक मन्दीका कारण प्रायोजन रकम कम जुटेपछि खर्च धान्न नसकिएको बताए।

प्रतियोगिताको इतिहासमा पहिलो पटक क्लबले घाटा व्यहोर्नुपरेको अध्यक्ष बरालले बताए।

प्रतियोगितामा ९९ लाख ९५ हजार आम्दानी भई १ करोड १५ लाख ३३ हजार खर्च भएको उनको भनाई छ।

प्रतियोगितामा प्रायोजनतर्फ ५६ लाख ७५ हजार आम्दानी भएको अर्थ संकलन उपसमितिका संयोजक सुनिल गुरुङले जानकारी दिएका छन्।

हिमश्री फुड्स प्रालिले २२ लाख २५ हजार, पोखरा महानगरपालिकाले १० लाख, गण्डकी प्रदेश खेलकुद परिषद्को ५ लाख गरी १४ संघसंस्था र व्यापारिक प्रतिष्ठानले प्रतियोगितामा प्रायोजन गरेको उनले बताए।

टिकट शुल्कबाट २६ लाख ३६ हजार संकलन भएको जनाइएको छ।

खर्चतर्फ सबैभन्दा बढी खेलाडीको दैनिक भ्रमण भत्तामा ३९ लाख ७३ हजार खर्च भएको अर्थ संकलकन उपसमितिका संयोजक गुरुङले बताए।

२३ औँ संस्करणको विजेता त्रिभुवन आर्मी क्लब र उपविजेता थ्री स्टार क्लब बनेको थियो।